युक्रेनले जित्यो यु–२० विश्वकप उपाधि

एजेन्सी – युक्रेनले फिफा यु–२० विश्वकप फुटबलको उपाधि जितेको छ । पोल्यान्डमा शनिवार राति भएको फाइनलमा युक्रेनले दक्षिण कोरियालाई ३–१ ले पराजित गर्दै उपाधि जित्न सफल भएको हो ।

युक्रेनले १ गोलले पछि परेको स्थिति उल्ट्याएर जित हात पारेको हो । खेलको पाँचौ मिनेटमा लि कानगिनले पेनाल्टीमार्फत गोल गर्दै दक्षिण कोरियालाई अग्रता दिलाएका थिए । दक्षिण कोरियाले भिएआरको सहायतामा पेनाल्टीको मौका पाएको थियो ।

३४औं मिनेटमा युक्रेनले गोल गर्दै खेललाई १–१ गोलको बराबरीमा ल्याएका थिए । भ्लाडिस्लाभ सुप्रिहाले गोल गरेका थिए । ५२औं मिनेटमा सुप्रिहाले नै व्यक्तिगत दोस्रो गोल गरेपछि युक्रेनले खेलमा २–१ को अग्रता लिन सफल भयो । ८९औं मिनेटमा हेओरीले गोल गर्दै युक्रेनलाई ३–१ को जित दिलाउदै विश्वकपको उपाधि जित्न सफल भयो ।

इटालीलाई अतिरिक्त समयमा १–० ले पराजित गर्दै इक्वेडरले तेस्रो स्थान हात पा¥यो ।
२३ मे बाट शुरु भएको विश्वकपमा २४ टोलीको सहभागिता रहेको थियो ।