काठमाडौं (हाम्रो खेलकुद)-युवा फरवार्ड रश्मी कुमारी घिसिङको उत्कृष्ट प्रदर्शनमा चन्द्रपुर नगरपालिका रौतहटले प्रथम उपमेयर कप अन्तर नगरपालिका महिला फुटबल प्रतियोगितामा फराकिलो जित दर्ता गरेको छ । रश्मी एक्लैले ८ गोल गरेपछि भीमेश्वर नगरपालिकामाथि फराकिलो जितसहित प्रतियोगितामा लगातार दोस्रो जित निकालेको छ ।

हल्चोकस्थित सशस्त्र प्रहरी बल (एपीएफ) को खेल मैदानमा शनिबार भएको खेलमा उपाधिको दावेदारको रुपमा हेरिएको चन्द्रपुरले भीमेश्वर नगरपालिकामाथि २२–० को फराकिलो जित निकालेको हो ।

चन्द्रपुरको फराकिलो जितमा यु–१९ राष्ट्रिय महिला टोलीका महन्तपुर्ण सदस्य रश्मी कुमारी घिसिङ एक्लैले ८ गोल गरिन् । राष्ट्रिय टोलीका सदस्य मन्जली योन्जनले ह्याट्रिकसहित ४ गोल गर्दा मेनुका आले मगरले ह्याट्रिक पुरा गरिन् । मेनुका नगरकोटे, मनिषा राउतले समान २ गोल गर्दा रजनी थोकर, निशा थोकर र समृद्धि सिंहले समान १ गोल थपिन् ।

लगातार दोस्रो जितसँगै चन्द्रपुर २ खेलबाट ६ अंक जोडेर समूह ‘सी’ मा शीर्षस्थानमा उक्लिएको छ । समान १ खेलबाट काठमाडौं र बाह्रबिसे ३ अंक जोडेर दोस्रो र तेस्रो स्थानमा रहेको छ । गोदावारी र भीमेश्वर अंकविहीन हुदै पुछारमा छ ।

शनिबारै बाह्रविसे नगरपालिका सिन्धुपाल्चोकले गोदावारी नगरपालिकालाई २–१ पराजित गरेको छ । बाह्रबिसेको जितमा अनु राई र सुष्मा तामाङले गोल गरिन् । गोदावारीका दीपा शाहीले एक गोल फर्काइन् ।

शनिबारै भएको समूह ‘ए’ को खेलमा वालिङ नगरपालिका स्याङ्जाले शम्भुनाथ नगरपालिका स्याङ्जालाई ११–० को फराकिलो गोल अन्तरले पराजित गरेको छ ।

एकपक्षीय खेलमा वालिङको फराकिलो जितमा शान्ता नेपालीले ५ गोलसहित ह्याट्रिक पुरा गरिन् । यस्तै सरस्वती हमालले ४ गोल गरिन् । अस्मिता रानपाल र लेख माया मास्कीले समान १ गोल गर्दै टोलीको फराकलो जित पक्का गरे ।

प्रतियोगितामा आइतबार दुई खेल हुनेछ । पहिलो खेलमा शम्भुनाथ नगरपालिका र बासगढी नगरपालिका तथा दोस्रो खेलमा वालिङ नगरपालिका र घोराही नगरपालिकाबीच खेल हुनेछ । सबै खेल हल्चोकमा हुनेछ ।

१८ टोलीले सहभागिता जनाएको प्रतियोगिता ११ असारसम्म सञ्चालन हुनेछ । प्रतियोगिताको विजेताले ५ लाख रुपैया हात पार्नेछन् । दोस्रो हुनेले ३ लाख रुपैया पाउनेछन् ।