एजेन्सी – कोपा अमेरिका २०१९ अन्तर्गत समूहको पहिलो खेलमा अर्जेन्टिनाले कोलोम्बियाको सामना गर्दैछ । नेपाली समयानुसार खेल आइतबार विहान ३:४५ बजे सुरु हुनेछ ।

अर्जेन्टिनाका प्रशिक्षक लिओनेल स्कालोनीले खेलको एक दिन अगाडी नै कोलोम्बियाविरुद्ध खेल्ने सुरुवाती ११ घोषणा गरेका छन् । टोलीको कप्तानी लिओनेल मेस्सीले गर्नेछन् । उनलाई आक्रमणमा सर्जियो अगुएरो र एन्जल डी मारियाले साथ दिनेछन् । यसक्रममा युभेन्टसका फरवार्ड पाउलो डिबाला र इन्टर मिलानका लौटारो मार्टिनेज भने बेन्चमा नै रहनेछन् । मार्टिनेजले पछिल्लो मैत्रीपूर्ण खेलमा निकारागुवाविरुद्ध दुई गोल गरेपछि अर्जेन्टिना ५-१ ले विजयी रहेको थियो ।

अर्जेन्टिनाले पछिल्लो १० खेलमा ६ जित,१ बराबरी र ३ हार बेहोरेको छ । फिफा वरीयतामा ११ औं स्थानमा रहेको अर्जेन्टिना प्रतियोगिताको वरीयतामा तेस्रो स्थानमा छ । ब्राजिल फिफा वरीयतामा तेस्रो र उरुग्वे छैटौं स्थानमा छन् । अर्जेन्टिनाको विपक्षी टोली कोलोम्बिया १४ औं स्थानमा छ ।

अर्जेन्टिनाको गोलरक्षकमा अर्मानी रहने छन् । डिफेन्समा निकोलस टाग्लीआफिको, जर्मन पेजेला, निकोलस ओटामेन्डी र सारविया रहेका छन् । मिडफिल्डमा लिआन्द्रो पारेडेस र गुइडो रोड्रीग्वेजले जिओभानी लो सेल्सोसँग मिलेर आक्रमणलाई सहयोग गर्नेछन् ।

अर्जेन्टिना सम्मिलित समूह बी मा एसियाली च्याम्पियन कतार, कोलोम्बिया र पाराग्वे रहेका छन् । यसअघि ब्राजिलले प्रतियोगिताको उद्घाटन खेलमा बोलिभियालाई पराजित गर्दै विजयी सुरुवात गरिसकेको छ ।

यो पनि : नेपाली समयमा कोपा अमेरिकाको पूर्ण खेलतालिका