एजेन्सी – कोपा अमेरिका २०१९ को उद्घाटन खेलमा घरेलु टोली ब्राजिलले बोलिभियामाथि सहज जित हासिल गरेको छ । दोस्रो हाफमा उत्कृष्ट प्रदर्शन गरेको ब्राजिलले ३-० को जित दर्ता गरेको हो ।

खेलको पहिलो हाफमा दुवै टोलीले गोल गर्न सकेका थिएनन् । ब्राजिलका आक्रमणमा खेल्ने खेलाडीले पाएको अवसर सदुपयोग गर्न सकेनन् । दोस्रो हाफमा भने ब्राजिलले सुरुवाती समयदेखि थप आक्रमण गर्दै अग्रता लिन सफल भएको थियो ।

ब्राजिलका लागि फिलिपे कोउटिन्होले ५० औं मिनेटमा पेनाल्टीमा गोल गर्दै अग्रता दिलाएका थिए । बोलिभियाका डिफेन्डरले ह्यान्ड गरेपछि रेफ्रीले भिडियो असिस्टेन्ट रेफ्री (भीएआर) को सहयोगमा निर्णय लिएका थिए । पेनाल्टीमा गोल गरेको तीन मिनेटपछि नै कोउटिन्होले अग्रता दोब्बर पारे । उनले रोबर्टो फिर्मिनोको क्रसलाई ६ यार्ड बक्सभित्रबाट अनमार्क रहेको अवस्थामा हेडरमार्फत गोल गरे ।

खेलको ८५ औं मिनेटमा वैकल्पिक खेलाडीको रुपमा मैदान प्रवेश गरेका विंगर एभरटनले गोल गर्दै सहज जित पक्का गरे । उनले मैदानको बायाँ विङ्गबाट बलमा उत्कृष्ट नियन्त्रण देखाउँदै गोल गर्न सफल रहे ।

यस जितसँगै ब्राजिलले पहिलो खेलमा नै ३ अंक जोड्न सफल रहेको छ । ब्राजिलको समूहमा बोलिभियासँगै पेरु र भेनेजुएला रहेका छन् ।