एजेन्सी – स्पेनिस महारथी रियल म्याड्रिडले १८ वर्षीय जापानी खेलाडी ताकेफुसा कुबोलाई अनुबन्धन गरेको छ । जापानी क्लब एफसी टोकियोबाट २ मिलियन युरोमा कुबो रियल आएका हुन् ।

यसअघि जापानका १८ वर्षीय ताकेफुसा कुबोलाई क्लबमा ल्याउन बार्सिलोना र रियलले नै अन्तरिक तयारीमा थालेका थिए । देशबाहिरका खेलाडीलाई १८ वर्ष नपुग्दै अनुबन्धन गर्न नपाइने हुँदा बार्सिलोना यसअघि पनि समस्यमा परिसकेको थियो । यसै वर्ष जुनमा १८ वर्ष पूरा भएपछि रियलले कुबोलाई अनुबन्धन गरेको हो । उनले रियलको दोस्रो टोलीमा रहेर करिअर सुरु गर्नेछन् ।

रियल र बार्सिलोनासँगै पीएसजीले पनि पछिल्लो समय ताकेका एजेन्टलाई सम्पर्क गरेको थियो । तर कुबोले रियललाई नै आफ्नो रोजाइमा राखेका थिए । यसअघि बार्सिलोनाले उनलाई उमेर नपुग्दै भित्र्याउँदा फिफाले कारवाही गरेको थियो । त्यसबेला उनले बार्सिलोनामा ३ वर्ष बिताउँदै उमेर समूहमा खेलेका थिए । कारवाहीपश्चात उनी जापान फर्केर त्यहाँको शीर्ष डिभिजनको लिग खेलेका थिए ।

कुबो आक्रामक मिडफिल्डमा खेल्दै गोल गर्ने अवसर सिर्जना गर्न माहिर मानिन्छन् । उनले आफ्नो उमेर समूहमा उत्कृष्ट प्रदर्शन गर्दै आएका छन् । प्राविधिक रुपमा निपुण ताकेले १६ वर्षको उमेरमा नै जापानको यू-२० टोलीबाट खेलिसकेका थिए । कुबो जापानको कोपा अमेरिका खेल्ने टोलीमा पनि सम्मिलित छन् । जापानको समूहमा इक्वेडर, चिली र उरुग्वे रहेका छन् ।