एजेन्सी – बेल्जियन तथा चेल्सीका फरवार्ड इडेन हजार्ड आधिकारिक रुपमा स्पेनिस महारथी रियल म्याड्रिडमा सार्वजनिक भएका छन् ।

क्लबले बिहीबार राति सान्टियागो बर्नबेउमा हजार्डलाई सार्वजनिक गरेको हो । उनको बिहीबार नै मेडिकल गरिएको थियो । उनलाई क्लबका अध्यक्ष फियोरेन्टिना पेरेजले सार्वजनिक गरे । तर, उनलाई रियलमा जर्सी नम्वर भने प्रदान गरिएको छैन । सम्भवत हजार्डले रियलको आइकोनिक ७ नम्वर जर्सी पाउने सम्भावना छ ।

सार्वजनिक कार्यक्रममा रियलका समर्थकहरु उपस्थित रहेका थिए । उनलाई क्लबले १५० मिलियन पाउन्डमा ५ वर्षका लागि अनुबन्ध गरेको हो । हजार्ड २०२४ सम्म रियलमा रहनेछन् ।

सान्टियागो बर्नबेउमा सार्वजनिक भएसँगै हजार्डले रियलको लोगोलाई किस गर्दै रियलबाट खेल्ने आफ्नो सपना पुरा भएको बताएका छन् ।

हजार्ड रियलमा अनुबन्ध हुने पाँच खेलाडीमध्ये चौथो खेलाडी बनेका छन् । रियलले यो सिजन रोड्रिगो, इडर मिलिटाओ, लुका जोभिक र इडेन हजार्डलाई क्लबमा अनुबन्ध गरिसकेको छ । फरल्यान्ड मेन्डीलाई ४९ मिलियन पाउन्डमा अनुबन्ध गर्दैछ । रियलले ५ खेलाडीलाई अनुबन्ध गर्न ३ सय ४४ मिलियन पाउन्ड खर्चिसकेको छ ।

‘सानैदेखि मेरो इच्छा रियलबाट खेल्ने थियो । आज आधिकारिक रुपमा अनुबन्ध भएको छु । अब त्यो सपना पुरा भएको छ ।’ हजार्डले भने, ‘रियलको जर्सीमा खेल्न पक्कै गाह्रो हुनेछ । तर, म चुनौती सामना गर्न तयार छु ।’

‘थ्याङ्क्यु अल भेरी मच हला म्याड्रिड’