एजेन्सी – अन्तर्राष्ट्रिय मैत्रीपुर्ण खेलमा कोलम्वियाले सहज जित हात पारेको छ । लिमामा आइतबार राति भएको खेलमा कोलम्वियाले १० खेलाडीमा समेटिएको घरेलु टोली पेरुलाई ३–० ले पराजित गरेको हो ।

कोलम्वियाको सहज जितमा मेटअस युरिवीले दुई तथा डुभान जापाटाले एक गोल थपे । खेलको २४औं मिनेटमा मेटअस युरिवीले गोल गरेपछि कोलम्वियाले पहिलो हाफमा १–० को अग्रता बनायो ।

५५औं मिनेटमा पेरु १० खेलाडीमा समेटियो । योसिमार योटुन रातो कार्ड खादै मैदानबाट बाहिरियो । त्यसको प्रत्यक्ष फाइदा कोलम्वियाले उठायो । ६६औं मिनेटमा मेटअसले व्यक्तिगत दोस्रो गोल गरे । ९०औं मिनेटमा डुभान जापाटाले गोल गर्दै टोलीलाई ३–० को जित दिलाए ।

पेरु र कोलम्विया दुवै टोली ब्राजिलमा आयोजना हुने कोपा अमेरिका कपको तयारीमा छ । कोलम्विया अर्जेन्टिनासँगै कतार र पाराग्वे रहेको समूह ‘बी’ मा रहेको छ । कोलम्वियाले १६ जुनमा अर्जेन्टिनासँग खेल्दैछ ।

पेरु रहेको समूह ‘ए’ मा आयोजक ब्राजिलसँगै भेनजुएला र बोलिभिया रहेका छन् । पेरुले १६ जुनमा भेनेजुएलासँग खेल्दै कोपा अमेरिका कपको शुरुवात गर्नेछ ।

अर्काे मैत्रीपुर्ण खेलमा मेक्सिकोले इक्वेडरलाई ३–२ को प्रतिस्पर्धात्मक जित निकाल्यो । मेक्सिकोका लुइस रोड्रिग्वेज, लुइस मोन्टेस र जोनाथान डोस सान्तोषले गोल गरे । इक्वेडरका इडवार प्रिसियाडो र एन्जेल मिनाले गोल फर्काए ।

यस्तै पाराग्वेले ग्वाटेमालालाई २–१ ले हरायो ।