काठमाडौं (हाम्रो खेलकुद) – नेपाली राष्ट्रिय पुरुष फुटबल टोलीका फरवार्ड विमल घर्तिमगरले माल्दिभ्सको शीर्ष श्रेणी क्लब टिसी स्पोर्ट्सबाट डेब्यु गरेका छन् ।

बिहीबार माल्दिभ्सको मालेस्थित राष्ट्रिय रंगशालामा भएको च्यारिटी सिल्डको पहिलो लेगमा टिसी र फोकाइधुबिचको खेल १-१ को बराबरीमा सकिएको हो । विमलले सुरुवाती रोजाइमा रहेर खेलेपनि गोल गर्न भने सकेनन् । टिसीका लागि ६५ औं मिनेटमा इस्माइल इसाले गोल गरेका थिए । खेलको ८८ औं मिनेटमा फोकाइधुका लागि हुसेन फाजिलले पेनाल्टीबाट बराबरी गोल फर्काएका थिए ।

खेलपछि हाम्रोखेलकुदसँग बोल्दै विमलले पहिलो खेल राम्रो रहेको प्रतिक्रिया दिए । ‘पहिलो खेल भएपनि राम्रो प्रदर्शन भयो । नयाँ मैदान भएकाले खेल्न केहि कठिन भएको थियो । अब दोस्रो लेग घरेलु मैदानमा खेल्दैछौं,’ उनले भने ।

टिसीले च्यारिटी सिल्डको दोस्रो लेग जुन १० मा घरेलु मैदानमा खेल्दैछ । विमलले टिसीसँग एक वर्षको सम्झौता गरेका हुन् । गत वर्ष टिसीले धिवेही प्रिमियर लिगको उपाधि जित्दा गोलरक्षक किरण चेम्जोङ लिगकै उत्कृष्ट गोलरक्षक चुनिएका थिए । यसपटक भने टिसीले किरणसंग मौखिक सम्झौता गरेपनि किरणले राष्ट्रिय टोलीबाट मैत्रीपूर्ण खेल खेल्ने निर्णय लिएपछि सम्झौता गर्न मानेको थिएन ।