इंगलिश प्रिमिएर लिग (इ.पी.एल) सिजन २०१५/१६ अन्तर्गत आज सबै क्लबले आफ्नो अन्तिम खेल खेल्दै छन्|

सिजनको सुरुवातदेखि आश्चर्यचकित तुल्याएको यस सिजन अन्तिम दिनसम्म पनि सोहि पथमा चलिरहेको छ| ठुला टोलीहरुको खस्किदो प्रदर्शनमाथि सानाटोलीहरुको उत्साहजनक जित र आशा लागेका खेलाडीहरुको बिर्सनलायक प्रदर्शन रहँदा नयाँ खेलाडीहरुले देखाएको कौशलले सिजनभर समर्थकहरुलाई मनोरन्जन प्रदान गर्यो|

लिगका सबै क्लबले आज एकै समयमा आ-आफ्नो अन्तिम खेल खेल्ने छन्| नेपाली समयानुसार साँझ ७:४५बजे खेल सुरु हुनेछ|

रेलिगेसनमा परिसकेको एस्टन भिल्लाले आर्सनलको घरमा खेल्नेछ भने उपाधि जितेको लेस्टरले गत सिजनको विजेता चेल्सीको मैदान स्ट्यामफर्ड ब्रिजमा सिजन टुंग्याउनेछ| भर्खरै म्यानेजर रोबर्टो मार्टीनेजलाई बर्खास्त गरेको एभर्टनले रेलिगेसनमा परेको नर्विचलाई निम्त्याउनेछ|

अन्य खेलमा म्यानचेस्टर युनाइटेडले विरुद्ध बर्नमाउथ, न्युकासल विरुद्ध टोटेनहम, साउथह्याम्पटन विरुद्ध क्रिस्टल प्यालेस र स्टक विरुद्ध वेस्ट ह्याम रहेको छ| च्याम्पियन्स लिगको आशा बोकेको म्यानचेस्टर सिटीले स्वान्सीको मैदानमा खेल्नेछ भने रेलिगेसन टारेको सन्डरल्याण्डले वाटफर्डको सामना गर्दैछ| लिभरपुलले आफ्नो अन्तिम खेल वेस्टब्रोमसंग खेल्नेछ|

च्याम्पियन्स लिग खेल्ने टोलि अझै टुंगो नलागेको स्थितिमा म्यानचेस्टर युनाइटेड र म्यानचेस्टर सिटि मध्य एक टोलि कम्तिमा चौथो स्थान हासिल गर्न आतुर छ| आजको खेलले छिनोफानो हुने सो स्थानमा आफ्नो नाम लेखाएर कसले खेल्ला त आगामी सिजन च्याम्पियन्स लिग?