सुबास हुमागाईं, काठमाडौं

नेपाली राष्ट्रिय पुरुष फुटबल टोलीले अन्तर्राष्ट्रिय मैत्रीपूर्ण खेलमा आइतबार मलेसियाको घरेलु मैदानमा २-० को हार बेहोर्यो । विश्वकप छनोटको तयारीमा रहेको नेपाली टोलीले दुवै गोल दोस्रो हाफमा खाएको थियो ।

नेपाली टोलीमा स्विडिस प्रशिक्षक योहान कालीनका अनुसार मलेसियाविरुद्ध नेपाल पराजित भएपनि त्यस हारबाट टोलीमा केहि सकारात्मक पक्ष पनि देखिएको छ ‌। ‘ हामीले अपेक्षा गरेअनुसार खेल निकै कठिन रहयो ‌। हामीले पूर्वयोजना अनुसार डिफेन्स अलिकति अगाडि बढेर खेल्ने तयारी गरेका थियौं, त्यसलाई लागु गर्न सकेनौं । हामीले अाफ्नाे हाफमा उनीहरुमाथि दवाव सिर्जना गर्न चुक्यौं’, कालीननले हाम्रो खेलकुदसँग भने ।

‘मलेसियाविरुद्ध खेलको बलियो पक्ष भनेको हामीलाई अोपन प्लेमा गोल गर्न निकै कठीन हुन्छ भन्ने सिद्ध भयो । दुवै गोल सेट पिसमा सम्भव भएको हो,’ प्रशिक्षक कालीनले थपे । नेपालले खेलको तयारीअघि नेपालमा गरेको प्रशिक्षणमा पनि सेट पिसलाई विशेष ध्यान दिएको थियो । मलेसियाविरुद्ध पहिलो गोल पेनाल्टी र दोस्रो गोल फ्रिकिकमा सम्भव भएको थियो ।

कालीनका अनुसार नेपालले बलिया टोलीविरुद्ध खेल्दा कमजोर पक्ष सुधार गर्ने अवसर प्राप्त हुन्छ । ‘हामीले आफूभन्दा बलियो प्रतिद्वन्द्वी रोज्नुको कारण हाम्रो कमजोर पक्ष थाहा होस् भनेर हो ‌। मलेसिया विरुद्ध नतिजालाई सामान्य रुपमा हेरेको छु । यसअघि पनि हामीले मलेसियासँग खेल्दा राम्रो नतिजा ल्याउन सकेका छैनौं । मलेसियाको घरेलु फुटबलको स्तर‌ निकै राम्रो छ । यी खेलाडीले हरेक साता स्तरीय लिग खेल्छन र हाम्रो त्यस्तो अवस्था छैन’, कालीनले थपे । नेपालले यसअघि कुवेतविरुद्ध खेलेका दुई खेलमा गोलरहित बराबरी र १-० को हार बेहोरेको थियो ।

नेपालले अब जुन ६ मा चाइनिज ताइपेइविरुद्ध मैत्रीपूर्ण खेल खेल्दैछ । उक्त खेलका लागि टोली मंगलबार ताइवान पुगिसकेको छ । ‘ ताइपेइविरुद्ध अहिले नै यो टोली भन्न सक्ने अवस्था छैन तर केहि परिवर्तन हुन सक्छ । मलेसिया बलियो थियो र ताइपेइले केहि समयअघि मलेसियालाई हराएको हुनाले झनै बलियो रहने देखिन्छ,’ उनले थपे, ‘हामीले राम्रो प्रदर्शन गर्ने अपेक्षा राखेको छु । विशेषत विपक्षीसँग बल हुँदाको अवस्थामा दवाव दिने पक्षमा हामीले थप सुधार गर्नुपर्छ ‌।’