कोलम्वियाको प्रभावशाली जित

एजेन्सी – अन्तर्राष्ट्रिय मैत्रीपुर्ण खेलमा कोलम्वियाले प्रभावशाली जित निकालेको छ । मंगलबार बिहान भएको खेलमा कोलम्वियाले पानामालाई ३–० ले हराएको हो । तीन खेलाडीले गोल गरेको खेलमा सबै गोल पहिलो हाफमा सम्भव भएको थियो ।

खेलको छैटौ मिनेटमा विलियन टेसिलोले गोल गर्दै कोलम्वियालाई अघि बढाएका थिए । ३८औं मिनेटमा लुइस मुनरेलले गोल गर्दा कोलम्विया २–० ले अघि बढेको थियो । पहिलो हाफमा इन्ज्युरी समयमा कप्तान राडामेल फल्काओले पेनाल्टीमा गोल गर्दै कोलम्वियालाई पहिलो हाफमा ३–० को अग्रता दिलाएका थिए ।

दोस्रो हाफमा पनि कोलम्वियाले गोलका केही मौकाहरु खेर फाल्दा थप गोल गर्न सकेनन् । र पहिलो हाफमा गरेको गोल नै कोलम्वियाको जितमा पर्याप्त बन्यो ।

कोलम्विया ब्राजिलमा आयोजना हुन लागेको कोपा अमेरिका कपको तथा पानामा कोन्काफ गोल्डकपको तयारीमा छ । त्यसअघि कोलम्वियाले १० जुनमा पेरुसँग मैत्रीपुर्ण खेल्दै छ ।

कोलम्विया कोपा अमेरिकामा अर्जेन्टिना, कतार र पारग्वे रहेको समूह ‘बी’ मा छ ।