काठमाडौं (हाम्रो खेलकुद) – अन्तर्राष्ट्रिय मैत्रीपूर्ण खेलमा आज नेपाल र मलेसिया भिड्दै छन् । नेपाली समयअनुसार साँझ ७:४५ मा हुने खेलका लागि नेपाली टोली शुक्रबार मलेसिया पुगेको थियो ।

एसियाली राष्ट्रहरुबीचको वरियतामा नेपाल र मलेसियाबीच एक स्थानको मात्र अन्तर छ । नेपाल ३४ औं स्थानमा छ भने मलेसिया ३५ औं स्थानमा छ । फिफा वरियतामा भने नेपाल १ सय ६१ औं र मलेसिया १ सय ६८ औं स्थानमा छ ।

एसियाली राष्ट्रबीच यत्ति एक स्थानको अन्तरमा नेपालले विश्व कप छनोटको सोझै दोस्रो चरणमा प्रवेश पाएको छ भने मलेसियाले छनोटको पहिलो चरण नै खेल्नुपर्नेछ । दोस्रो चरणमा एसियाका ४० राष्ट्रले प्रतिस्पर्धा गर्नेछन् । ३५ औं देखि ४६ औं स्थानको वरियतामा रहेका टोलीले पहिलो चरणमा प्रतिस्पर्धा गर्नेछन् । होम एन्ड अवेको खेल पछि विजेता ६ टोली दोस्रो चरणमा छनोट हुनेछन् ।

त्यहि विश्व कपको छनोट चरणको तयारीमा रहेको नेपाल र मलेसियाबीच आइतबार राती मैत्रीपूर्ण खेल हुनेछ । दुई मैत्रीपूर्ण खेलका लागि नेपाल शुक्रबार विदेश भ्रमणमा निस्केको थियो । मलेसियाबाट जेठ २१ मा नेपाली टोली चाइनिज ताइपे पुग्नेछ । जहाँ घरेलु टोलीसँग नेपालले जेठ २३ गते प्रतिस्पर्धा गर्नेछ ।

नयाँ प्रशिक्षक योहान कालिनको प्रशिक्षण पछि नेपाली टोलीले यसअघि मैत्रीपूर्ण खेलका लागि कुवेत यात्रा गरेको थियो । जसमा पहिलो खेलमा गोलरहित बराबरी खेलेको नेपालले अर्को खेलमा १–० को हार बेहोरेको थियो । अर्कोतर्फ मलेसियाले यहि बर्ष एयर मारिनी कप फुटबलमा सिंगापुरसँग १–० को हार र अफगानिस्तानसँग २–१ को जित निकालेको थियो ।

मैत्रीपूर्ण खेलअघि शनिबार नेपाली टोलीले क्वालालम्पुरस्थित बुकिट जेलुङटन सिमडबी रंगशालामा अभ्यास गरेको थियो । नेपाली टोलीका प्रशिक्षक कालिनले शनिबारको प्रि म्याच कन्फ्रेन्समा मलेसियासँगको खेललाई स्तर बढाउनका लागि मौका हुने बताएका छन् । ‘मलेसियाले पछिल्लो समय खेलिरहेको छ ,’ उनले भने,’ हामी पनि राम्रो खेल्ने प्रयास गर्नेछौं । फिफा वरियतामा हामी भन्दा तल भए नी खेल प्रतिस्पर्धात्मक हुनेछ ।’

नेपाली टोलीका कप्तान विराज मर्हजनले मलेसियाविरुद्धको खेल महत्वपूर्ण भएकाले राम्रो खेल्ने प्रयास गर्ने बताए । मलेसियाका प्रशिक्षक टान चेङ ह्वेले नेपाली टोलीविरुद्ध आफ्ना खेलाडीले उच्च प्रदर्शन गर्ने विश्वास व्यक्त गरे ।

पछिल्लो समयको मौसमका कारण मैत्रीपूण खेलका लागि सन्तोषजनक तयारी नभएपनि सफल नतिजाका लागि प्रयास गर्ने उनले बताए । भर्खरै घरेलु टोलीको कप्तानी सम्हालेका फरिजाल मार्लियसले टोली नेपालविरुद्ध खेल्नका लागि तयार रहेको बताए ।