एजेन्सी – युरोपा लिग फाइनलमा बुधबार चेल्सीले आर्सनललाई ४-१ ले पराजित गर्दा स्पेनिस मिडफिल्डर पेड्रो रोड्रीग्वेजले टोलीका लागि दोस्रो गोल गरेका थिए ।

उक्त फाइनलमा गोल गरेसँगै पेड्रो च्याम्पियन्स लिग, युरोपेली सुपर कप, क्लब विश्वकप र युरोपा लिग फाइनलमा गोल गर्ने पहिलो स्पेनिस खेलाडी बने । पेड्रोले आफ्नो करिअरमा २५ उपाधि जितिसकेका छन् । बार्सिलोनामा रहँदा उनले ५ पटक लिग उपाधि, ३ पटक कोपा डेल रे, ४ पटक स्पेनिस सुपर कम, ३ च्याम्पियन्स लिग, ३ युरोपेली सुपर कप र २ क्लब विश्वकप जिते ।

चेल्सीमा आएपछि उनले प्रिमियर लिग, एफए कप र युरोपा लिग जितिसकेका छन् । स्पेनको राष्ट्रिय टोलीबाट पनि उनले फिफा विश्वकप र युरोपेली च्याम्पियनसिप जितेका थिए । सन् २००९ मा पेड्रोले अभूतपूर्व प्रदर्शन गरेका थिए । उनले एकै वर्षमा ला लिगा, कोपा डेल रे, स्पेनिस सुपर कप, च्याम्पियन्स लिग, युरोपेली सुपर कप र विश्वकप गरि ६ फरक प्रतियोगितामा गोल गर्ने किर्तिमान बनाए ।

पेड्रोले यस सिजन कुल १३ गोल गरे । प्रिमियर लिगमा ८ गोल गरेका पेड्रोले युरोपा लिगको फाइनलसहित ५ गोल गरे । उनी प्रशिक्षक माउरिजियो सार्रीको योजनामा महत्त्वपूर्ण खेलाडीका रुपमा स्थापित रहे । पेड्रो च्याम्पियन्स लिग र युरोपा लिग दुवैको फाइनलमा गोल गर्ने पाँचौ खेलाडी हुन् ।