काठमाडौं (हाम्रो खेलकुद) – नेपाली राष्ट्रिय फुटबल टोलीको आधिकारिक जर्सी निर्माता कम्पनि केल्मी नेपालको सामाग्रीको अनाधिकृत रुपमा नक्कल गर्नेलाई अखिल नेपाल फुटबल संघ (एन्फा) ले चेतवानी दिएको छ । एन्फाले शुक्रबार एक सूचना जारी गर्दै अनधिकृत कार्य गर्नेलाई कानुनी कारवाही हुने जनाएको हो ।

गत फागुनमा एन्फा र केल्मीले राष्ट्रिय टोलीले प्रयोग गर्ने नयाँ स्वोरुपको जर्सी सार्वजनिक गरेका थिए । राष्ट्रिय फुटबल टोलीसँगै उमेर समुहका टोलीले प्रयोग गर्ने सामाग्री पनि केल्मीले प्रदान गर्दै आएको छ । नेपालमा केल्मीको विक्री तथा वितरण गर्ने सर्वाधिकार कामारु ट्रेडीङ प्रालिले प्राप्त गरेको र एन्फाको लोगो अंकित जर्सी उक्त संस्थाले मात्र गर्न पाइने सूचनामा उल्लेख छ ।

एन्फाका अनुसार अन्य संस्थाले संघको लोगो प्रयोग गरेर राष्ट्रिय टोलीले प्रयोग गर्ने जर्सी बनाउन र बेचबिखन गर्न पनि नपाइने उल्लेख गरिएको छ । नेपाली बजारमा केल्मीको लोगो बिना एन्फा लोगोसहित उस्तै स्वरुपको नक्कली जर्सी बाहिरिन थालेपछि एन्फाले सूचना जारि गरेको हो ।

केल्मीले राष्ट्रिय टोलीसँगै लिग च्याम्पियन मनाङ मर्स्याङदी र त्रिभुवन आर्मी क्लबको लागि पनि जर्सी निर्माण गर्दै आएको छ । देशका विभिन्न स्थानमा केल्मीको आउटलेट रहेको र अनलाइनमार्फत पनि केल्मीको अधिकारिक जर्सी खरिद गर्न पाइने हुँदा अनधिकृत जर्सी खरिद नगर्न कामारु ट्रेडीङका प्रबन्ध निर्देशक उत्तम न्यौपानेले सम्पूर्ण खेलप्रेमीलाई आग्रह गरेका छन् ।