डम्बेल छातीमा खस्दा जर्मनीका प्रशिक्षक लोउ घाइते

एजेन्सी – जर्मनीको राष्ट्रिय फुटबल टोलीका प्रशिक्षक जोकिम लोउ जिममा डम्बेल उठाउने क्रममा छातीमा खसेपछि घाइते भएका छन् । अर्को साता हुने युरो छनोटको खेलमा लोउ उपस्थित हुने छैनन् ।

५९ वर्षिय प्रशिक्षक लोउलाई डम्बेल छातीमा खसेपछि विश्राम मात्र गरेका थिए । तर केहि दिनपछि उनको छातीमा समस्या आएपछि अस्पताल जाँदा उनको रक्तसंचारमा समस्या आएको देखिएको थियो । उनको आर्टरीले सरल रुपमा काम गर्न नसक्दा उनलाई केहि साता विश्राम लिन डाक्टरले सुझाएका छन् । त्यसैकारण उनले राष्ट्रिय टोलीको जिम्मेवारीबाट विश्राम लिनुपर्ने भएको हो ।

जर्मनीले युरो छनोट अन्तर्गत अर्को साता बेलारुस र इस्टोनियाको सामना गर्दैछ । लोउको स्थानमा सहायक प्रशिक्षक मार्कस सोर्ग र गोलरक्षक प्रशिक्षक आन्द्रियास कोपकेले टोलीको जिम्मेवारी सम्हाल्नेछन् । छनोट खेलका लागि रियल म्याड्रिडका मिडफिल्डर टोनी क्रुस र बार्सिलोनाका गोलरक्षक मार्क आन्देर टेर स्टेगन उपलब्ध रहेका छैनन् ।

जर्मनीले छनोटको पहिलो खेलमा नेदरल्यान्ड्सलाई ३-२ ले पराजित गर्दै उत्कृष्ट सुरुवात गरिसकेको छ । विश्वकप २०१८ मा खराब प्रदर्शन गरेको जर्मनी युरो छनोटमा सुखद नतिजा आत्मसात गर्न चाहन्छ । यस समूहमा सुरुवाती दुवै खेल जितेको उत्तरी आयरल्यान्ड शीर्षस्थानमा छ ।