स्याम ह्यारिस, बीबीसी

विश्वका सर्वाधिक महँगा खेलाडीको लागि पछिल्लो केहि साता सुखद रहन सकेको छैन । यसै साता ब्राजिलको प्रशिक्षणमा युवा खेलाडी वेभरटनले नेयमारलाई नटमेग गरेपछि नेयमारले दिएको अभिव्यक्तिले सामाजिक संजालमा हंगामा मचायो । नेयमारको खुट्टाको बीचबाट बल छलाउने बितिकै १९ वर्षीय वेभरटनलाई नेयमारले तानेर मैदानमा लडाएका थिए ।

यो घटना नेयमार ब्राजिलको प्रशिक्षणमा सामेल भएको केहि दिनमा भएको हो । नेयमार प्रशिक्षणमा आउँदा ११.५ मिलियन पाउण्ड मुल्यको हेलिकप्टर चढेर आएका थिए । उनको यस्तै व्यवहारले आजित भएपछि प्रशिक्षक टिटेले राष्ट्रिय टोलीको कप्तानको जिम्मेवारी डिफेन्डर ड्यानी आल्भेसलै सुम्पेका हुन् । दुवै नेयमार र आल्भेस फ्रान्सेली क्लब पेरिस सेन्ट जर्मेनबाट खेल्ने गर्छन् ।

क्लब फुटबलमा पनि पीएसजीसँग यो सिजन नेयमारका लागि सुखद रहन सकेन । मे महिनामा उनलाई फ्रान्सेली फुटबलले ३ खेलको लागि प्रतिबन्ध लगायो । कप डे फ्रान्सको फाइनलमा समर्थकसँग दुर्व्यवहार गरेपछि उनी समस्यामा परेका थिए । त्यसअघि उनले मोन्टपेलरसँग हारपछि ड्रेसिङ रुममा आफ्नै सहकर्मीसँग पनि भनाभन भएको खुलासा भएको थियो ।

दुई वर्षअघि विश्व कीर्तिमानी मुल्यमा पीएसजी आएका नेयमारको भविष्यमाथि अहिले प्रश्नचिन्ह उठेको छ । उनलाई बारम्बार बार्सिलोना र रियल म्याड्रिडले अनुबन्धन गर्न खोजेको खबर संचारमाध्यममा आइरहेको अवस्था छ । बार्सिलोना र ब्राजिलका पूर्वखेलाडी रिभाल्डोले नेयमार बार्सिलोनाले च्याम्पियन्स लिग जित्न आवश्यक परेको एकमात्र खेलाडी रहेको पनि बताएका छन् ।

नेयमार आफैंले पनि सन् २०१५ मा बार्सिलोनालाई उपाधि दिलाएपछि च्याम्पियन्स लिगमा सुखद यात्रा तय गर्न सकेका छैनन् । सन् २०१६ मा बार्सिलोनासँग रहेर क्वाटरफाइनलमा बाहिरिएका उनले सन् २०१७ र १८ मा अन्तिम १६ यात्रा नै पार गर्न सकेनन् । यस सिजन पीएसजी म्यानचेस्टर युनाइटेडसंग पराजित भएको थियो । उक्त पराजयमा नेयमारले रेफ्रीको निर्णयप्रति रुष्ट हुँदै दिएको नकारात्मक अभिव्यक्तिलाई लिएर आलोचना समेत भएको थियो ।

यो सबका बाबजुद पनि नेयमार ब्राजिलका लागि मुख्य खेलाडी हुन् । अर्को महिना ब्राजिलमा नै हुने कोपा अमेरिकामा उनी हेर्नैपर्ने खेलाडी रहनेछन् । उनले खेलमा मात्र ध्यान दिए उनी विश्वकै उत्कृष्टमध्य एक खेलाडी हुन् तर उनले मैदानमा रहँदा देखाउने अनावश्यक कार्यले भने केहि समर्थक रुष्ट हुने गरेका छन् । कोपा अमेरिकामा ब्राजिलको जर्सी लगाउने नेयमारले अर्को सिजन कुन क्लबको जर्सी लगाउनेछन् भन्नेबारे समयले नै बताउनेछ ।