कोन्टे इन्टर मिलानका प्रशिक्षक नियुक्त

एजेन्सी – इटालियन क्लब इन्टर मिलानले प्रिमियर लिग क्लब चेल्सीका पूर्व प्रशिक्षक एन्टोनियो कोन्टेलाई प्रशिक्षकको जिम्मेवारी सुम्पिएको छ ।

केहि दिनअघि मात्र प्रशिक्षक लुसियानो स्पालेटीलाई प्रशिक्षक पदबाट बर्खास्त गरेको इन्टरले ४९ वर्षीय इटालियन प्रशिक्षकलाई अनुबन्ध गरेको हो । कोन्टे गत सिजन चेल्सीबाट बर्खास्तीमा परेका थिए । उनले चेल्सीमा दुइ सिजन बिताउँदै प्रिमियर लिग र एफए कप उपाधि जितका थिए । त्यसअघि उनले युभेन्टसबाट तिन पटक सिरी ए उपाधि जितेका थिए ।

इन्टर मिलानले यस सिजन लिगमा चौथो स्थान हासिल गर्दै च्याम्पियन्स लिगको लागि छनोट हुन सफल भएको थियो । तर क्लब व्यवस्थापनले स्पालेटीको कार्यशैलीप्रति असन्तुष्टि व्यक्त गर्दै उनलाई बर्खास्त गर्ने निर्णय लिएको हो । कोन्टेले अनुबन्धन भएपछि इन्टरलाई बलियो स्थानमा फर्काउने लक्ष्य रहेको बताएका छन् ।

‘यो मेरो जिन्दगिको नयाँ पाटो हो र म निकै उत्साहित छु । मैले इन्टर मिलनको प्रस्ताव स्विकार्नुको पछाडी क्लबको दीर्घकालीन योजना पनि हो,’ उनले थपे, ‘ इन्टर बलियो इतिहास भएको क्लब हो र म क्लबका पुराना दिन फर्काउन तत्पर रहनेछु ।’