काठमाडौं (हाम्रो खेलकुद) – प्रधानमन्त्री राष्ट्रिय एक दिवसिय क्रिकेट प्रतियोगितामा प्रदेश २ ले पहिलो जित हात पारेको छ ।

बुधबार टियु क्रिकेट मैदानमा भएको खेलमा कर्णालीलाई ९ विकेटले पराजित गरेको छ । पहिलो खेलमा प्रदेश २ आर्मीसँग १ सय ७१ रनको फराकिलो अन्तरले पराजित भएको थियो ।

९४ रनको सामान्य लक्ष्य प्रदेश २ ले १६ ओभरमा १ विकेटको क्षतिमा पुरा गर्यो । प्रदेश २ लाई सहज जित दिलाउन ओपनर हरि शंकर शाहले ६४ बलमा ७ चौका सहित ५५ रनमा अविजित रहे । त्यस्तै रवि शाह १५ बलमा १ चौका सहित १६ रनमा नट आउट रहे ।

सातौं ओभरको पाँचौ बलमा प्रकाश जैशीले विकेटकीपर सुसान्त थाहाबाट क्याच गराउनु अघि हासिम अन्सारीले १८ बलमा ३ चौका सहित १७ रन बटुले ।

त्यसअघि कर्णालीका लागि प्रकाश जैशीले सर्वाधिक ३७ रनको योगदान दिए । ३० ओभरको तेस्रो बलमा कुमार थापाले क्याच आउट गराउनु अघि ५४ बलमा ४ चौका प्रहार गरे । सुरुवात देखिनै खराब प्रर्दशन गरेको कर्णालीले पहिलो विकेट दोस्रो ओभरको पाँचौ बलमा सुसान्त थापालाई ४ रनमा गुमाएको थियो । सुसान्तलाई दिवान्सु मलिकले एलवीडब्लू आउट गरे ।

नवौं ओभरको दोस्रो बलमा राशिद खानले निश्चिल रावललाई विकेटकीपर हासिम अन्सारीलाई ४ रनमा क्याच आउट गराए । १३ ओभरको पहिलो बलमा साम्सद शेखले दिनेश पुनलाई ७ रनमा बोल्ड आउट गरे । १८ ओभरको पाँचौ बलमा कप्तान रविन्द्र जंग शाहीलाई कुमार थापाले १४ रनमा बोल्ड आउट गरेपछि कर्णाली संकटमा परेको थियो । शाहीले २९ बलमा २ चौका प्रहार गरे । कर्णालीको निरन्तर विकेट पतन जारी रह्यो ।

महेश खत्री डक, ललित प्याकुरेल ५, दिनेश अधिकारी र दिवान पुन समान ४ रनमा आउट भए । प्रदेश २ का लागि कुमार थापाले ८ ओभरमा ३५ रन खर्चेर ३ विकेट लिए । हरि शंकर शाह,साम्सद शेख र राशिद खानको नाममा समान २ विकेट रह्यो । दिवान्सु मलिक १ विकेट लिए ।