एजेन्सी – यसै सिजन इटालियन क्लब युभेन्टस पुगेका स्टार फरवार्ड क्रिस्टियानो रोनाल्डोका लागि यो सिजन विगत एक दशकयताकै खराब रहयो ।

रियल म्याड्रिड छाडेर युभेन्टस पुगेका रोनाल्डोले यस सिजन ४३ खेलमा २८ गोल गरेका थिए । सामान्य खेलाडीको लागि यो निकै राम्रो रेकर्ड हो । तर पछिल्लो एक दशक विश्वस्तरीय प्रदर्शन गर्दै आएका रोनाल्डोका लागि भने यो पछिल्लो एक दशककै खराब प्रदर्शन रहयो ।

रोनाल्डोले रियल म्याड्रिडमा रहँदा हरेक सिजन कम्तिमा ३३ गोल गरे । उक्त संख्या पनि उनको रियल म्याड्रिडमा डेब्यु सिजनमा रहँदाको थियो । रियलमा ९ वर्ष बिताएका रोनाल्डोले ६ सिजनमा ५० भन्दा बढी गोल गरेका थिए । उनले सन् २०११/१२ मा ६० गोल तथा सन् २०१४/१५ मा ६१ गोल गरेका थिए ।

यस सिजन रोनाल्डोले ४३ खेल खेल्दै ०.६५ गोल प्रति खेलको औसतमा गोल गरे । रोनाल्डोले सन् २००८/०९ मा ५३ खेलमा २६ गोल गरेका थिए । यस सिजन रोनाल्डो सिरी ए को सर्वाधिक गोलकर्ताको सुचिमा चौथो स्थानमा रहे । उनी फाबियो क्वागलीआरेल्ला (२६), डुभान जपाटा (२३) र क्रिस्टोफ पियाटेक (२२) गोल भन्दा पछाडी रहे ।

रोनाल्डोको रियालमा प्रदर्शन :
२००९-१० : ३३ गोल
२०१०-११ : ५३ गोल
२०११-१२ : ६० गोल
२०१२-१३ : ५५ गोल
२०१३-१४ : ५१ गोल
२०१४-१५ : ६१ गोल
२०१५-१६ : ५१ गोल
२०१६-१७ : ४२ गोल
२०१७-१८ : ४४ गोल