एजेन्सी – क्याटलान क्लब बार्सिलोनालाई स्तब्ध बनाउँदै भ्यालेन्सिया स्पेनिस कोपा डेल रेको च्याम्पियन बनेको छ ।

शनिबार राति भएको खेलमा बार्सिलोनालाई २–१ ले स्तब्ध बनाउदै भ्यालेन्सिया कोपा डेल रे च्याम्पियन बनेको हो । सेभियामा भएको खेलमा बार्सिलोनालाई स्तब्ध बनाउन केभिन गेमेरियो र रोड्रिगोले गोल गरे । बार्सिलोनाका कप्तान लियोनल मेस्सीले गोल गरेपनि हार टार्न सकेनन् ।

भ्यालेन्सियाले पहिलो हाफको सुरुमै लिएको दुई गोलको अग्रता जोगाइराख्न सफल भयो । २१औं मिनेटमा केभिन गेमेरियाको गोलबाट भ्यालेन्सियाले खेलमा अग्रता बनायो । उनले जोसे गायाको पासलाई सदुपयोग गरेका थिए ।

बलियो बार्सिलोनाविरुद्ध भ्यालेन्सियाले ३३औं मिनेटमा रोड्रिगोले गोलबाट अग्रता दोब्बर बनाए । उनले कार्लाेस सोलेरको पासलाई सदुपयोग गरेका थिए ।

दुई गोलले पछि परेपछि बार्सिलोनाले भ्यालेन्सियालाई दवावमा राख्दै १ गोल फर्काउन सफल भएको थियो । तर, थप गोल निस्कन नसक्दा बार्सिलोना उपाधि जित्नबाट वञ्चित बन्यो । ७३औं मिनेटमा कप्तान लियोनेल मेस्सीले गोल गर्दै बार्सिलोनालाई खेलमा फर्काउने संकेत दिएका थिए ।

भ्यालेन्सिया सन् २००८ पछि पहिलोपटक कोपा डोल रे च्याम्पियन बनेको हो । भ्यालेन्सिया समग्रमा आठौंपटक कोपा डेल रे च्याम्पियन बनेको हो ।