लन्डन (एजेन्सी)– टोटेनहम हट्सपरका प्रशिक्षक माउरिसियो पोचिन्टोले रियल म्याड्रिडका विङ्गर गेराथ बेलको पुनरागमनका बारेमा बोलेका छन् । जिनेदिन जिदानले पुनः रियलको प्रशिक्षण सम्हालेदेखि नै बेलले पहिलो रोजाईमा पर्न संघर्ष गर्दै आएका छन् ।

बेल र जिदानबीचको सम्बन्ध पहिले देखि उतारचढावपूर्ण रहँदै आएको छ । जसका कारण आउने सिजनमा उनले क्लब छाड्ने सम्भावना पनि उत्तिकै छ । छ सिजन रियलमा बिताएका बेल पुन लन्डन फर्कने सम्भावना रहेको अड्कल काटिएको छ ।

सुरुमा लोन र त्यसको एक वा दुई वर्षमा स्थायी रुपमा टोटेनह्याम सरुवाका विषयमा पनि चर्चा भएको बताइएको छ । यद्दपी अहिले सबै विषय तय भने भएको छैन । ‘उनी रियलका खेलाडी हुन् ,’बेलको सरुवाका विषयमा सोधिएको प्रश्नमा मुस्कुराउँदै पोचिन्टाले भने,’हाम्रा बीचमा राम्रो सम्बन्ध छ । हामीले उनीविरुद्ध गत वर्ष खेलेका थियौं । उनको खेल राम्रो छ । यहाँ पनि धेरैलाई उनको सम्झना छ । ‘

बेल र रियलबीचको सम्झौता अझै तीन वर्ष बाँकी छ । अर्जेन्टिनी प्रशिक्षकले भने,’परिस्थिति यस्तो छ की न उनका लागि सहज छ , न त क्लबको लागि ।’ रियल पुगेपछि बेलले ला लिगा एक पटक तथा च्याम्पियन्स लिग चार पटक जितिसकेका छन् । तर, रियल पुगेदेखि नै पटक पटक चोटग्रस्त बनेका उनको खेलमा पनि एकरुपता रहन सकेन ।

बेलको आगमनले टोटेनहमको आक्रमण बलियो हुनेछ । यदि यो सरुवा सम्भव भए दुवै पक्षलाई फाइदा हुने अपेक्षा गरिएको छ । रियल जानु अघि बेल टोटेनहममा लगातार तीन वर्ष उत्कृष्ट खेलाडी चुनिएका थिए ।