एजेन्सी – स्पेनिस कोपा डेल रेको उपाधि भिडन्तमा शनिबार क्याटलन क्लब बार्सिलोना र भ्यालेन्सिया भिड्दैछन् । सेभिल्लामा हुने खेलमा बार्सिलोना कीर्तिमानी लगातार पाँचौ कोपा डेल रे उपाधि पछ्याउँदै छ ।

बार्सिलोनाले लगातार छैटौंपटक फाइनल यात्रा तय गरेको हो । यसअघि लगातार ४ फाइनलमा बार्सिलोना सफल भएको छ । यसअघि रियल म्याड्रिड (१९०५-०८) र एथलेटिक क्लब (१९३०-३३) ले पनि लगातर ४ उपाधि जितेका थिए । रियल लगातार पाँचौ उपाधि जित्दै नयाँ कीर्तिमान रच्ने दाउमा छ । युरोपका शीर्ष ५ लिगमा कुनैपनि टोलीले लगातार ५ सिजन यो सफलता हात पर्न सकेका छैनन् ।

बार्सिलोनाले सेमिफाइनलमा रियल म्याड्रिडलाई समग्रमा ४-१ ले पराजित गर्दै फाइनलमा स्थान बनाएको हो । घरेलु मैदानमा १-१ को बराबरी खेलेको बार्साले रियलको मैदानमा ३-० को जित दर्ता गरेको थियो । त्यसअघि सेभिल्लासँग क्वाटरफाइनलमा २-० ले पछाडी परेको बार्साले घरेलु मैदानमा ६-१ को फराकिलो जित दर्ता गरेको थियो ।

भ्यालेन्सियाले सेमिफाइनलमा रियल बेटिसलाई ३-२ ले पराजित गरेको थियो । अवे मैदानमा २-२ को बराबरी खेलेको भ्यालेन्सियाले घरेलु मैदानमा १-० को जित दर्ता गरेको थियो । क्वाटरफाइनलमा गेटाफे पनि ३-२ ले पराजित भएको थियो ।

सन् २०१८ फेब्रुअरीमा बार्साले भ्यालेन्सियालाई ७-० ले पराजित गरेको थियो । भ्यालेन्सियाका प्रशिक्षक मार्सेलिनोको टोलीले बार्सिलोनासँग २० पटक खेल्दा कुनै खेलमा पनि जित हासिल गरेको छैन । पछिल्लो २९ भेटमा भ्यालेन्सियाले बार्सालाई २ पटक मात्र हराएको छ ।