एजेन्सी – रियल म्याड्रिडका कप्तान सर्जियो रामोसले समर ट्रान्सफर विन्डोमा क्लब छाड्न सक्ने सम्भावना रहेको छ । सिजन २०१८/१९ मा रियलले बिर्सनलायक प्रदर्शन गरेपछि भविष्यलाई लिएर चिन्तित रहेका रामोसले क्लब छाड्ने विकल्प रोज्न सक्ने बुझिएको छ ।

स्पेनको चर्चित संचारमध्य मार्साका अनुसार रामोसले सिजनको अन्त्यतिर चोटका कारण खेल्न नसक्दा आफ्नो भविष्यबारे सोचेका थिए । उनले स्पेनकै अन्य क्लबमा भने नखेल्ने मनिस्थिति राखेका छन् । युरोपको अन्य क्लबबाट उचित प्रस्ताव आएमा उनले स्पेनको राजधानी छाड्ने तयारी गरेका छन् ।

पछिल्लो समय म्यानचेस्टर युनाइटेड र पेरिस सेन्ट जर्मेनले रामोसको अवस्थालाई नजिकबाट नियालेका छन् । विगतमा दुवै क्लबले रामोसलाई अनुबन्ध गर्ने प्रयास गरेका थिए । तर त्यसबेला रामोसले सिधै क्लबहरुको प्रस्ताव नकारेका थिए । रामोसले आफ्नो उमेर बढेसँगै नयाँ अनुभव बटुल्ने इच्छा पनि व्यक्त गरेका हुन् ।

रियलका उच्च पदस्थ अधिकारीले रामोस बाहिरिने हल्लाबाट त्रसित भएपनि औपचारिक जानकारी नपाएको बताएका छन् । आयाक्सविरुद्ध घरेलु मैदानमा पराजित भएपछि रामोस क्लबसँग निराश भएका थिए । क्लबले रोनाल्डोको प्रस्थानपछि ट्रान्सफर विन्डोमा उचित खेलाडी नकिनेको भन्दै रामोसले असन्तुष्टि व्यक्त गर्दै आएका छन् ।