एजेन्सी – म्यानचेस्टर युनाइटेडका पूर्व स्ट्राइकर रोविन भान पर्सीले आर्सनलका समर्थकहरुसँग माफी मागेका छन् । आफुले क्लब छाड्दा यदि समर्थकलाई दुःख लागेका छ भने त्यसप्रति क्षमा चाहेको उनले बताए ।

यद्दपी उनले आर्सनल छाडेकोमा भने कुनै पछुतो नभएको प्रष्ट पारेका छन् । लामो समय आर्सनलमा बिताएका भान पर्सीले युनाइटेडमा प्रिमियर लिग उपाधि जितेका थिए ।

भान पर्सी झन्डै एक दशक आर्सनलमा रहे । भान पर्सीको झन्डै एकल प्रयासमा आर्सनलले उनको वर्ष प्रिमियर लिगमा तेस्रो स्थानमा प्राप्त गरेको थियो । त्यसपछि उनी युनाइटेड पुगेका थिए । यद्दपी उनको सरुवा विवादरहित भने रहेन ।

नेदरल्यान्ड्सका पूर्व अन्तर्राष्ट्रियले केहि दिनअघि आफ्नो खेल जीवनको अन्तिम खेल खेलेका थिए । उनले आर्सनल प्रति ठूलो श्रद्धा प्रकट गरे । फुटबल छाड्दा पनि क्लब प्रतिको आफ्ना भावना उस्तै रहेको उनले प्रष्ट पारेका छन् ।

‘ म सँग समर्थकहरु रुष्ट थिए । म क्लबको कप्तान, सर्वाधिक गोल कर्ता र अन्तिम वर्ष हामी तेस्रो भएका थियौं । तर मैले नयाँ चुनौति र गन्तव्य रोज्न सहि ठाने,’ उनले स्मरण गरे,’ त्यस कारणले समर्थकको चित्त दुःखेको भए म त्यसमा क्षमा चाहन्छु । तर मैले लिएको निर्णयमा म अहिले पनि कायम छु । आर्सनलप्रति मेरो कहिल्यै नाकारात्मक धारणा छैन । ‘

उनले आर्सनल फुटबल क्लब प्रति एक शब्द पनि नराम्रो बोल्न नसक्ने पनि प्रष्ट पारेका छन् । ‘यो एउटा सुन्दर फुटबल क्लब हो । मेरो त्यहाँको अनुभव गज्जवको छ । म सानो केटोको रुपमा त्यहाँ पुगेको थिए र एउटा परिपक्क खेलाडी बनेर छाडेको थिए,’ उनले थपे,’ आर्सनलका कोहि प्रति पनि मेरो गुनासो छैन । मलाई मौका दिएको प्रति म टिम प्रति आभारी छु । आफुमा रहेको कमजोरीलाई मैले सुधार्ने मौका पाए । मैले आफ्नै मुर्खताका कारण रातो कार्ड खाए । क्लब मेरो लागि पुरा परिवार जस्तो थियो । ‘

आर्सनलका समर्थकले भान पर्सीलाई तत्काल माफी दि हाल्ने सम्भावना छैन । यद्दपी उनले आर्सनल छाडेर भने व्यक्तिगत रुपमा भने सहि निर्णय लिए । जसले उनलाई प्रिमियर लिग उपाधि विहिन हुनबाट जोगाएको थियो ।