एजेन्सी – विश्व फुटबलको सर्वोच्च निकाय फिफाले सन् २०२२ मा कतारमा हुने फिफा विश्वकपमा ३२ टोलीको मात्र सहभागिता रहने प्रष्ट पारेको छ ।

फिफाले यसअघि औपचारिक रुपमा नै प्रतियोगितालाई ४८ टोलीमा बढाउने प्रयास गरेको थियो । मध्यपूर्वी गल्फ क्षेत्रको राजनीतिक परिस्थिति तथा सहभागी टोली र समर्थकलाई आवश्यक पर्ने सुविधा नपुग्ने देखिएपछि फिफाले ३२ टोलीलाई नै निरन्तरता दिने भएको हो । फिफा अध्यक्ष जियानी इन्फान्टिनोले कतारले मानव अधिकार र श्रमसम्बन्धि कुनै समस्याबिना नै विश्वकप आयोजना गर्न आशावादी रहेको पनि बताए ।

कतार विश्वकपको सहभागी टोली संख्या बढाउँदा कम्तिमा १६ खेल कतारबाहिर खेलाउनुपर्ने अवस्था थियो । कतारको अन्य गल्फ राष्ट्रसँग सम्बन्ध राम्रो नहुँदा यूएई, बहराइन र साउदी अरेबियालाई सहआयोजकको रुपमा लिन सकिएको थिएन । सम्भावना रहेका कुवेत र ओमानमध्य ओमानले आयोजनाका लागि इच्छा व्यक्त गरेन । कुवेतको हकमा उपलब्ध भएका दुई रंगशालाको तयारीमा समय अपुग रहने फिफाले निष्कर्ष निकालेको हो ।

यस निर्णयसँगै विश्वकप २०२६ सम्म सहभागी टोली नबढ्ने पक्का भएको छ । फिफाले सन् २०२६ का लागि भने ४८ टोलीको सहभागिता हुने पक्का गरिसकेको छ । प्रतियोगिता संयुक्त राज्य अमेरिका, क्यानडा र मेक्सिकोले संयुक्त रुपमा आयोजना गर्नेछन् ।