रियो (एजेन्सी)– रियल म्याड्रिडले आफ्नो आक्रमणलाई थप मजबुत बनाउनका लागि केलियन एमबाप्पले र नेयमारमध्ये एकलाई लिन प्रयास गर्ने बार्सिलेनाका पूर्व स्ट्राइकर रिभाल्डोले बताएका छन् ।

ब्राजिलियन महान खेलाडीले एन्टोनियो ग्रिज्मनको बार्सिलोना जाने सम्भावनाका विषयमा पनि बोलेका छन् । उनले ग्रिज्मन जाँदा केहि खेलाडीले आफ्नो ठाँउ असुरक्षित हुने महसुस गरेको अनुमान गरेका छन् ।

एएससँगको अन्तवार्ताको क्रममा रिभाल्डोले भने, ‘मलाई लाग्छ रियलले नेयमार वा एमबाप्पले मध्ये एकलाई लिने प्रयास गर्नेछ । टोलीलाई थप मजबुत बनाउन उनीहरुलाई त्यो स्तरका खेलाडीको आवश्यकता पर्दछ । ठूलो नामका खेलाडीले त्यस्तो क्लबमा जाने हक राख्छन् । दुवै खेलाडी रियलका लागि लायक छन् ।’

पिएसजीका प्रशिक्षक थोमस टुचेलसँग एमबाप्पे रुष्ट रहेको अनुमान गरिएको छ । एमबाप्पे केहि गोलका कारण युरोपियन गोल्डेन बुट जित्नबाट असफल भए । यदि उनले क्लबमा महत्वपूर्ण भूमिका पाउने भने थप गोल गर्ने सक्ने एमबाप्पेको विश्वास रहेको बताइएको छ ।

नेयमारले दुई वर्षअघि बार्सिलोना छाडेको प्रशंगमा पनि रिभाल्डोले आफ्नो धारणा राखेका छन् । ‘मलाई लाग्छ बार्सिलोना छाड्नु उनको गल्ति थियो । तर नेयमार , पिता वा परिवारका अन्य सदस्यलाई सोध्ने हो भने गल्ति होइन भन्छन्,’ उनले थपे,’ तर मलाई लाग्छ उनले गल्ति गरे । बार्सिलोना भनेको बार्सिलोना हो । नेयमार बार्सिलोनाको स्तरका खेलाडी हुन् ।’