एजेन्सी – इटालियन सिरी ए अन्तर्गत आइतबार युभेन्टस र एटालान्टाबीचको खेल १-१ को बराबरीमा सकिएको छ । लिग विजेता युभेन्ट्सका लागि प्रशिक्षक मासिमिलानो एलेग्रीले घरेलु मैदानमा अन्तिम खेलमा टोली सम्हाले ।

खेलको ३३ औं मिनेटमा पाहुना टोलीका लागि जोसिप इलिचिचले खराब डिफेन्डीङको फाइदा उठाउँदै गोल गरेका थिए । खेलको १० मिनेट समय बाँकी रहँदा मारियो मान्जुकिचले गोल गर्दै खेल बराबरीमा ल्याए । दोस्रो हाफको इन्ज्युरी समयमा फेडेरिको बर्नार्डेस्की रातो कार्ड खाँदै बाहिरीएपछि युभेन्टस १० खेलाडीमा सिमित भएको थियो । खेलको समापनपछि युभेन्ट्सलाई लिग विजेताको ट्रफी प्रदान गरिएको थियो ।

युभेले सन् २०१२ पछि लगातार ४ खेलमा जित निकाल्न सकेन । यस नतिजासँगै एटालान्टा लिगको तेस्रो स्थानमा उक्लिएको छ । चौथो स्थानको इन्टर मिलानको समान ६६ अंक भएपनि हेड टु हेडमा एटालान्टा अगाडी छ । इन्टर आइतबार भएको अर्को खेलमा नेपोलीसँग ४-१ ले पराजित भएको हो ।

युभेन्टसले एक महिना अगाडी नै लिग उपाधि पक्का गरिसकेको थियो । प्रशिक्षक एलेग्री ५ वर्षपछि क्लब छाड्न लागेका हुन् । उनले यसबिचमा युभेन्ट्सलाई लगातार घरेलु उपाधि दिलाउन सफल रहे । रोनाल्डोलाई पनि खेलअघि लिगको प्लेयर अफ द इयरको उपाधि दिइएको थियो ।

अर्काे खेलमा एसी मिलानले फ्रोसिनवानलाई २–० ले हरायो । मिलानका क्रिस्टोफ पियाटिक र सुसोले गोल गरे । जितसँगै मिलानले अर्काे सिजनको च्याम्पियन्स लिगको लागि छनोट हुने सम्भावना जीवितै राखेको छ ।

मिलान ३७ खेलबाट ६५ अंक जोडेर पाँचौ स्थानमा रहेको छ । सिरी ‘ए’ को अन्तिम चरणमा मिलानले एसपालसँग खेल्दैछ । यो खेलमा मिलानले जित निकालेको अवस्था र चौथो स्थानको इन्टर मिलान अन्तिम खेलमा इम्पोलीसँग पराजित भए मिलान चौथो स्थानमा उक्लदै च्याम्पियन्स लिगलाई छनोट हुनेछ ।

सिरी ‘ए’ का शीर्ष चार टोलीले च्याम्पियन्स लिगमा स्थान बनाउने छ । पाचौ हुनेने युरोपा लिगा तथा छैटौ हुनेले युरोपा लिगको लागि छनोट चरण खेल्नुपर्ने हुन्छ ।