एजेन्सी – स्पेनिस ला लिगा अन्तर्गत आइतबार भएको अन्तिम खेलमा बार्सिलोनालाई एइबारले बराबरीमा रोकेको छ । एइबारको मैदानमा भएको खेलमा कप्तान लिओनेल मेसीले २ गोल गरेपनि खेल २-२ को बराबरीमा सकियो ।

खेलको २० औं मिनेटमा मार्क कुकुरेल्लाले सर्जी एन्रीचको पासमा गोल गर्दै एइबारलाई अग्रता दिलाएका थिए । तर मेसीले दुई मिनेटको अन्तरमा दुई गोल गर्दै बार्सिलोनालाई अग्रता दिलाए । मेसीले ३१ औं मिनेटमा आर्टुरो भिडालको पासमा बराबरी गोल फर्काए । त्यसको एक मिनेटमा नै इभान राकीटिचको पासमा मेसीले दोस्रो गोल गरे ।

पहिलो हाफको अन्तिम मिनेटमा पाब्लो डे ब्लासिसले गोल गरेपछि एइबार खेलमा फर्किएको थियो । दोस्रो हाफमा दुवै टोलीले गोल गर्न नसक्दा खेल २-२ कै बराबरीमा सकियो ।

यस नतिजासँगै मेसी लिगको सर्वाधिक गोलकर्ता पनि बनेका छन् । उनले लिगका ३४ खेल खेल्दै ३६ गोल गरे । युरोपेली गोल्डेन बुटमा पनि उनले किलियन एमबाप्पेसँग ४ गोलको अग्रता बनाएका छन् । उनले जारि सिजन सबै प्रतियोगितामा ५० गोल पनि पुरा गरे ।

बार्सिलोनाले शीर्षस्थानमा ३८ खेल खेल्दै ८७ अंक जोड्दै लिगको अन्त्य गर्यो । दोस्रो स्थानको एटलेटिको ११ अंक पछाडी रहँदा रियल म्याड्रिड १९ अंक पछाडी रहयो ।