बार्सिलोना (एजेन्सी)– एन्टोनियो ग्रिजमनलाई उत्कृष्ट खेलाडी बताएका बार्सिलोनाका प्रशिक्षक इर्नेस्टो भाल्भेर्डेले कोपा डेल रेको फाइनल अघि कुनै पनि खेलाडीसँग सम्झौता नगरिने प्रष्ट पारेका छन् ।

ग्रिजमनले हालैमात्र एट्लेटिको म्याड्रिड छोड्ने बताएपछि उनी बार्सिलोनामा आबद्ध हुने चर्चा सुरु भएको थियो । विश्व कप विजेता फ्रान्सेली फरवार्डका लागि बार्सिलोना १ सय ८ मिलियन पाउन्ड रिलिज रकम तिर्न तयार भइसकेको बताइएको छ ।

भाल्भेर्डे आफै ग्रिजमनसँग सिधा सम्पर्कमा रहेको बताएको छ । क्लबले अन्य खेलाडीका विषयमा पनि छलफल सुरु गरिसकेको बताइएको छ । यद्दपी भ्यालेन्सियासँग अर्को साता हुने कोपा डेल रे फाइनल अघि बार्सिलोनाले कुनै खेलाडी लिने छैन ।

‘यो साँचो हो की ग्रिजमनलाई हामीले पछ्याएको थियौं । तर यो सिजन अझै सकिएको छैन,’ प्रशिक्षक भाल्भेर्डेले भने,‘ कोपा डेल रेको फाइनल खेल्न बाँकी छ । हामी अहिले त्यसैमा केन्द्रित छौं ।’

उनले सम्झौता गर्न अझै समय रहेको पनि बताएका छन् । ‘हामीले तत्काल सबै कुरा भन्ने अवस्था हुदैन । किनकी हामीले चाहेका खेलाडीको क्लबसँग पनि सल्लाह गर्नुपर्ने हुन्छ,’ उनले भने, ‘हेर्दै जाउ के हुन्छ । ग्रिजमन उत्कृष्ट खेलाडी हुन् । मैले यो सधै भन्दै आएको छु ।’