एजेन्सी – साविक विजेता बायर्न म्युनिखले लगातार सातौं पटक जर्मन बुन्डेसलिगा उपाधि जितेको छ । शनिबार लिगको अन्तिम खेलमा बायर्नले आइनट्राक्ट फ्रान्कफर्टलाई ५-१ को फराकिलो अन्तरले पराजित गर्दै उपाधि पक्का गरेको हो ।

शनिबारै भएको अर्को खेलमा बोरुसिया डर्टमुन्डले बोरुसिया मोन्चेनग्लाडबाकमाथि २-० को जित दर्ता गरेपनि उपाधि होडमा दोस्रो स्थानमा रहयो । बायर्नले लिगको ३४ खेलमा ७८ अंक जोड्दा डर्टमुन्डले ७६ अंक मात्र जोड्न सक्यो ।

बायर्नका लागि लिगको चौथो मिनेटमा किंग्सले कोमानले अग्रता दिलाएका थिए । दोस्रो हाफमा सबस्टियन हाल्लरले ५० औं मिनेटमा बराबरी गोल फर्काउँदै बायर्नलाई केहि कठिन बनाएका थिए । तर डेविड अलावाले तीन मिनेटमा नै बायर्नलाई अग्रता दिलाए । युवा मिडफिल्डर रेनाटो सान्चेसले उत्कृष्ट गोल गर्दै ५८ औं मिनेटमा अग्रता दोब्बर पारे ।

बायर्नका लागि अन्तिम खेल खेलिरहेका फ्रान्क रिबेरी र आर्जेन रोबेनले पनि १-१ गोल गरे । दुवै खेलाडीले वैकल्पिक खेलाडीको रुपमा मैदान प्रवेश गर्दै गोल गरे । यस जितसँगै बायर्नले लगातार ७ सिजन लिग उपाधि जितेको छ ।

डर्टमुन्डको जितमा जेडन सान्चो र मार्को रिउसले १-१ गोल गरे । लिगमा उत्कृष्ट प्रदर्शन गरेपनि दोस्रो स्थानमा रहेको डर्टमुन्डका लागि सिजनको मध्यभागमा नतिजा बिग्रनु दुर्भाग्य सावित भयो ।