एजेन्सी – इंग्लिस क्लब चेल्सीलाई फिफाले दुई विन्डोको लागि खेलाडी अनुबन्धमा प्रतिबन्ध लगाएको छ । यो प्रतिबन्धविरुद्ध चेल्सीले कोर्ट अफ आर्विटेसन फर स्पोर्टस् (सिएएस) मा अपिल गरिरहेको छ ।

यो अपिलमा सफलता हात पारे चेल्सीले आयाक्सका युवा स्टार ब्राजिली डेभिड नेरेसलाई क्लबमा अनुबन्ध गर्ने प्रक्रिया अघि बढाउने योजना बनाएको छ ।

खेलाडी अनुबन्धमा प्रतिबन्ध हुन अगावै चेल्सीले जर्मन क्लब फ्रान्कफर्टका लुका जोभिकलाई अनुबन्ध गर्ने प्रयास गरेको थियो । तर, जोभिक स्पेनिस क्लब रियल म्याड्रिडमा जाने पक्का भएपछि चेल्सीले आयाक्सका नेरेसलाई क्लबमा अनुबन्ध गर्ने योजना बनाएको हो ।

यसै विन्टरमा लोनमा ल्याएका अर्जेन्टिनी फरवार्ड गोन्जलो हिगुआइनलाई युभेन्टस पठाउने निर्णय गरेसँगै चेल्सी नयाँ फरवार्डको खोजीमा छ । नेरेससँग चेल्सीले डिफेन्डर डेभिड लुइजको माध्यमबाट सकरात्मक सम्बन्ध बनाइरहेको छ ।

नेरेसलाई अनुबन्ध गर्न पीएसजी, लिभरपुल र आर्सनल पनि दौड धुपमा छन् । २२ वर्षीए नेरेसको मुल्य ४० मिलियन पाउन्ड तोकिएको छ । नेरेसकै उच्च प्रदर्शनमा आयाक्सले डच लिग र डच कोपा कप जित्नुका साथै च्याम्पियन्स लिगमा सेमिफाइनलसम्मको यात्रा तय गरेको थियो ।

च्याम्पियनस लिगको प्रि–क्वाटरफाइनलमा रियल म्याड्रिडलाई दोस्रो लेगमा ४–१ ले पराजित गर्दा नेरेसले उच्च प्रदर्शन गरेका थिए । २२ वर्षीय नेरेसले यो सिजन आयाक्सका लागि ४२ खेलमा १० गोल गर्न सफल भएका छन् ।

चेल्सीले अझै एक सिजन ओलिभर जिरुडलाई क्लबमै राख्ने निर्णय गरेको छ । क्रिस्टियन पुलिसिक यसै सिजन क्लबमा फर्कदैछन्। उनलाई हजार्डको विकल्पमा अघि सारिएको छ । हजार्ड म्याड्रिड जाने तयारीमा छ । ट्यामी अब्राहम, मासन माउन्टलगायत लोन सकाउँदै चेल्सी फर्कंदैछन् । लोनमै एट्लेटिको मड्रिड पुगेका अल्भेरो मोराटा त्यही रहनेछन् ।