काठमाडौं (हाम्रो खेलकुद) – नेपाली राष्ट्रिय महिला फुटबल टोलीका दुई सदस्य सम्मिलित सेथु फुटबल क्लब इन्डियन वुमन्स लिग (आईडब्लूएल)को सेमिफाइनलमा प्रवेश गरेको छ । शनिबार सम्पन्न लिगको अन्तिम खेलमा सेथुले बरोडा फुटबल एकेडेमीलाई ७-० ले पराजित गर्दै लिगमा शत प्रतिशत नतिजा कायम गर्यो ।

लिगमा लगतार पाँचौ जित दर्ता गर्ने क्रममा सेथुका लागि सन्ध्याले ४ गोल गर्दा आशालता देवी, इन्धुमथी कासिरेथान र रतनबाला देवीले १-१ गोल गरे । नेपाली राष्ट्रिय टोलीकी फरवार्ड सावित्रा भण्डारी सुरुवाती रोजाईमा रहेपनि गोल गर्न भने सकिनन् । अर्की नेपाली खेलाडी अनिता बस्नेत भने बेन्चमा रहेकी थिइन् । सावित्राले यसअघि लिगका चारै खेलमा गोल गरेकी थिइन् ।

सेथुले लिगको ५ खेलमा ५ जित दर्ता गर्दै लिगको शीर्ष स्थानमा रहेर सेमिफाइनल यात्रा तय गरेको हो । यसक्रममा टोलीले ३४ गोल गर्दै ४ गोल मात्र खाएको छ । यस समूहबाट मणिपुर पुलिस स्पोर्ट्स क्लब उपविजेता बन्दै सेमिफाइनल प्रवेश गर्यो । अर्को समूहबाट गोकुलम केरला शीर्षस्थान र सेन्ट्रल एसएसबी वुमन्स दोस्रो स्थानमा रहे ।

सेथुले अब फाइनल प्रवेशका निम्ति सोमबार सेन्ट्रल एसएसबीको सामना गर्नेछ । प्रतियोगिताको फाइनल खेल बुधबार हुनेछ ।