प्रकाश तिमल्सिना, काठमाडौं

व्यासायिक फुटबलका लागि नयाँ उडान भर्ने तयारीमा रहेको नेपाली राष्ट्रिय फुटबल टोलीका फरवार्ड विमल घर्तिमगरले माल्दिभ्सको यात्रा आफ्ना लागि अवसर र चुनौति दुवै भएको बताएका छन् ।

माल्दिभ्सको टिसी स्पोर्टसमा आबद्ध भएका उनी अर्को साता त्यसतर्फ जाँदैछन् । टिसी स्पोर्टस् त्यहि क्लब हो जहाँ राष्ट्रिय टोलीका गोलकिपर किरण चेम्जोङले पछिल्लो दुई सिजन बिताए । पछिल्लो सिजन टोलीलाई त्यहाँको लिग च्याम्पियन बनाउ भूमिका खेलेका किरण तेस्रो सिजन पनि सोही क्लबमा आबद्ध भएका छन् । किरण यसपटक विमललाई समेत लिएर जाने तयारीमा छन् ।

‘यो मेरो लागि अवसर हो । आफ्नो करियरलाई अर्को स्तरमा लग्नका लागि ,’ १४ वर्षको उमेरमा राष्ट्रिय टोलीमा डेब्यू गरेका विमलले भने,‘ मैले देश भित्र लिगमा राम्ररी खेल्न पाएको छैन । म पछि आएर भएपनि एक पटक हाम्रो देशको लिगमा राम्ररी खेल्न चाहन्छु ।’

२०७२ मा पहिलो राष्ट्रिय लिगमा सुदूरपश्चिम टोलीबाट खेलेका विमलले यसपटक भ्याली च्यासल युथ क्लबबाट ए डिभिजन लिगमा ‘डेब्यू’ गरेका थिए । तर, उनले न त लिग पुरा खेले, न सोचे अनुरुपको प्रदर्शन नै गर्न सके । लिगको बीच भागमा नै उनी बेल्जियम गएका थिए । बेल्जियम त्यो उनको पहिलो पटक थिएन । त्यसअघि पनि उनीले बेल्जियमका केहि क्लबमा अभ्यास गरेका थिए ।

अन्य खेलाडीमा जस्तै उनमा पनि नेपाललाई साफ च्याम्पियन बनाउने धोको छ । पछिल्ला तीनै संस्करणमा साफ च्याम्पियनसिप टोलीमा रहेका उनी नेपाली टोली केहि अभागी रहेको स्वीकार्छन् । ‘हामीले जत्ति राम्रो गरेपनि फाइनल पुग्न सकेको छैनौं,’ उनले स्मरण गरे,‘ सन् २०१३ मा घरेलु मैदानमै भएको साफ च्याम्पियनसिप होस् वा गत वर्ष बंगलादेशमा भएको होस् । दुवै पटक हामी सेमिफाइनलबाट बाहिरियौं ।’

एन्फा एकेडेमीमा एउटै ब्याचबाट उत्पादन अनन्त तामाङसँग बस्दै आएका विमलले समय र उमेरसँगै आफुमा परिपक्वता आएको पनि स्वीकार गरे । ‘मैले कतिपय कुरा आफैले पनि जानिन । अब विस्तार कुरा बुझ्दै छु । आफु पनि पहिला भन्दा परिपक्क भएजस्तो लाग्छ,’ उनले भने,‘अनन्त मेरो एकदमैको निकट छ । हामीबीचमा व्यक्तिगत कुरा पनि हुन्छन् । एक अर्कालाई सल्लाह पनि दिन्छौं । समय सँगै ममा पनि परिवर्तन आइसकेको छ ।’

विमलले फुटबल गतिविधि रोकिदा सबैभन्दा बढी मार खेलाडीलाई पर्ने भएकाले त्यसलाई क्रियाशील बनाउन पनि आग्रह गरे । ‘पछिल्ला केहि वर्ष फुटबल नुहँदा खेलाडीलाई धेरै असर पर्यो । फुटबल खेलाडी धेरै जस्तो गरिब परिवारबाट आउने परम्परा छ ,’ उनले थपे,‘ फुटबल नै आफ्नो रोजीरोटीको बाटो भएपनि खेलाडीसँग विकल्प हुन्न । खेल नभएपछि खेलाडीले विकल्पका रुपमा विदेश जानुपर्ने बाध्यता हुन्छ । आउने दिनमा त्यसको परिस्थिति नहोस् । खेलाडीले खेलेर खाने वातावरण बनोस् ।’

विमलले जीवनमा निकै दुःख सहनु परेको स्मरण गर्दै समर्थकहरुलाई सधै साथ दिनका लागि आग्रह गरे । जस्तै दुःखमा पनि तपाईहरुले साथ दिनुभएको छ । त्यहि साथले म यहाँ सम्म आएको हु,’ उनले भने,‘ म सक्दो राम्रो गर्ने कोशिस गर्छु । तपाईहरुलाई खुसी पार्ने प्रयास गर्नुछु ।’

बहिनिका मृत्युका कारण आफ्नो खेल जीवनमा त्यसको असर परेको पनि उनले स्मरण गरे । २०७३ असार १३ गते उनकी बहिनी मनिषा बर्दघाट ८ मा मृतावस्थामा भेटिएकी थिइन् । त्यसपछि उनी फुटबलमा फर्कन समय लागेको थियो । ‘ मैले आफ्नो जीवनमा धेरै खाले दुःख भोगेको छु । सबै अवस्थामा मलाई ममीले साथ दिनुभएको छ,’ उनले भने,‘उहाँकै आर्शिवाद र साथले म फेरि फुटबलमा फर्केन सफल भएको हु ।’

अर्को एक प्रसंगमा उनले नेपालका लागि सर्वाधिक गोलको कीर्तिमान तोड्ने लक्ष्य रहेको पनि बताए । पूर्व स्ट्राइकरद्वय हरि खड्का र निराजन रायमाझीको नाममा समान १३ गोल छ । त्यो नेपालका लागि अहिले सम्मको सर्वाधिक गोल हो । पछिल्लो ११ वर्षयता त्यो कीर्तिमान तोडिएको छैन । अहिले अन्तर्राष्ट्रिय प्रतियोगिता र मैत्रीपूर्ण खेलमा नेपालले धेरै भाग लिने भएकाले कीर्तिमान भंग गर्ने सम्भावना रहेको विमलले बताए । ‘अहिले धेरै खेल हुन्छन् । मलाई लाग्छ त्यो कठिन काम छैन । टोलीको लागि खेल्दै जाँदा हामीले सफलता हात पार्ने नै छौं,’ उनले थपे,‘ मेरो पनि ८ गोल पुगिसकेको छ । म पनि त्यो तोड्न सक्छु । मेरो लक्ष्य त्यो कीर्तिमान तोड्ने छ । ‘

विमलले माल्दिभ्सको लिगको अनुभवले नेपाली टोलीलाई फाइदा पुग्ने समेत अपेक्षा राखेका छन् । ‘किरण दाईका कारण मैले अवसर पाउँदै छु । मेरो कारण अरुले अवसर पाए भने त्यो झनै राम्रो ,’ उनले जोडे,‘ बढी भन्दा बढी खेलाडीले माथिल्लो स्तरको लिग खेल्ने अवसर पाएमा त्यसले पक्कै पनि नेपाली टोलीको प्रदर्शनमा प्रभाव पार्नेछ । ’

उनी राष्ट्रिय टोलीमा नयाँ प्रशिक्षक योहान कालिनको आगमनले आउने दिनमा सुखद नतिजा आउनेमा आशावादी पनि छन् । ‘उहाँको सिकाउने शैली र समन्वयको शैली मलाई राम्रो लाग्यो,’ उनले भने,‘ म पछिल्लो मैत्रीपूर्ण भ्रमणमा थिइन । तर पनि हाम्रो टोलीले राम्रो प्रदर्शन गर्यो । तयारीलाई राम्रो गर्दै जाने हो भने साफ च्याम्पियनसिप हामीले जित्ने सम्भावना छ । ’

विमलसँगको पूरा अन्तर्वार्ता भिडियो हेर्नुहोस् :