एजेन्सी – एटलेटिको म्याड्रिडका फरवार्ड एन्टोइन् ग्रिज्मनले यसै साता स्पेनिस क्लब छाड्ने घोषणा गरे । फ्रान्सलाई विश्वकप उपाधि दिलाउन महत्त्वपूर्ण भूमिका खेलेका ग्रिज्मनले कुनै क्लबमा सम्झौता नगर्दै एटलेटिको छाड्ने निर्णय लिएका हुन् ।

बार्सिलोनाले लामो समयदेखि ग्रिज्मनलाई पछ्याएको खबर संचारमाध्यमले जनाउँदै आएका छन् । पछिल्लो ट्रान्सफर विन्डोमा बार्सिलोनाले औपचारिक रुपमा बार्सिलोनालाई प्रस्ताव पनि गरेको थियो । तर यसपटक भने बार्सिलोनाले कुनै अधिकारिक कदम अगाडी चालेको छैन । मंगलबार सामाजिक संजाल ट्वीटरमा भिडियो सार्वजनिक गर्दै ग्रिज्मनले आफ्नो निर्णय सुनाएका थिए ।

उनले सन् २०१४ मा रियल सोसीडाडबाट एटलेटिको आएयता २ सय ५६ खेल खेल्दै १ सय ३३ गोल गरेका छन् । लिगको दोस्रो स्थानमा रहेको एटलेटिकोले हालसम्म ग्रिज्मनको लागि कुनै क्लबबाट आधिकारिक प्रस्ताव प्राप्त गरेको छैन ।

ग्रिज्मनले एटलेटिकोमा रहँदा सन् २०१८ मा युरोप लिग जिते । उनले क्लबका लागि हासिल गरेको सफलता त्यहि मात्र हो । एटलेटिकोले यस सिजन घरेलु मैदानमा च्याम्पियन्स लिग खेल्ने लक्ष्य राखेको थियो । तर युभेन्टसले उत्कृष्ट पुनरागमन गर्दै एटलेटिकोको यात्रा अन्तिम १६ मा समाप्त गरेको थियो ।

ग्रिज्मनले अहिलेसम्म आफ्नो देश फ्रान्सको क्लबबाट खेलेका छैनन् । फ्रान्समा पेरिस सेन्ट जर्मेन (पीएसजी) ग्रिज्मनका लागि उत्तम विकल्प देखिन्छ । तर नेयमार र एमबाप्पे मध्य एकले क्लब नछाडे पीएसजीले ग्रिज्मनमाथि खर्च गर्न सक्ने अवस्था छैन । नेयमार रियल म्याड्रिड जाने हल्ला चलिरहँदा ग्रिज्मन फ्रान्सको राजधानी पेरिस जाने सम्भावना पनि प्रबल छ । यसले बार्सिलोनालाई भने घाटा हुन सक्छ ।