अर्जेन्टिना (एजेन्सी) – अर्जेन्टिना राष्ट्रिय टोलीका पूर्व फरवार्ड ग्यब्रिएल बाटिस्टुटा फुटबलबाट सन्न्यास लिएपछि अहिले हिड्न नसक्ने अवस्थामा पुगेका छन् । खेल जीवनमा अत्यधिक मिहेनती खेलाडीका रुपमा परिचित बाटिस्टुटाले फिफासँग लिएको अन्तर्वार्तामा बोल्दै आफुले अत्यधिक दुखाइका कारण डाक्टरलाई खुट्टा काटिदिन आग्रह गरेको खुलासा गरे ।

इटालियन क्लब फियोरेन्टिना, इन्टर मिलान र एएस रोमाबाट खेल्दै २ सय भन्दा बढी गोल गरेका बाटिस्टुटाले सन् २००५मा सन्न्यास लिएका थिए । उनले फिफासँगको अन्तर्वार्तामा आफुले धेरै मिहेनत गरेको कारण अहिले निकै दुख भोगेको बताए । ‘मैले आफ्नो खेलजीवनमा फुटबल बाहेक केहि पनि हेरिन। अहिले मेरो खुट्टामा निकै दुखाइ छ । मलाई सामान्यरुपमा हिड्न पनि निकै गाह्रो हुन्छ । मैले डाक्टरलाई मेरो खुट्टा काटेर उपचार गर्न पनि भनेको थिएँ तर त्यो सम्भव भएन ।’

लगातार १७ वर्षसम्म व्यवसयिक फुटबल खेलेका बाटिस्टुटाले लामो समय खेल्दा आफ्नो खुट्टा निकै कमजोर भएकोले यस्तो भएको बताए। उनले त्यस समयको इटालियन फुटबल र अहिलेमा निकै फरक रहेको पनि बताए। ‘त्यस समयमा इटालियन लिग अब्बल थियो, तर अहिले प्रिमियर लिग र ला लिगा निकै माथिल्लो स्तरमा छन् । मलाई आशा छ कि एकदिन इटालियन लिग पुन: माथि उठ्नेछ ।’

बाटिस्टुटाले सन्न्यास लिंदा उनि अर्जेन्टिनाका सर्वाधिक गोलकर्ता रहेका थिए। हाल लियोनेल मेस्सीले उक्त कीर्तिमान आफ्नो नाममा लेखाइसकेका छन् । बाटिस्टुटाले अर्जेन्टिनाका लागि ७८ खेलमा ५४ गोल गरेका थिए ।