काठमाडौं (हाम्रो खेलकुद) – एएफसी कप फुटबल अन्तर्गत चौथो चरणको खेलमा पहिलो हाफमा घरेलु टोली मनाङ–मर्स्याङ्दि क्लब भारतीय आई लिग च्याम्पियन क्लब मिनर्वा पन्जावसँग १–० ले पछि परेको छ ।

सातदोबाटोस्थित एन्फा कम्प्लेक्सको खेल मैदानमा जारी खेलमा पाहुना टोलीले खेलको ३९औं मिनेटमा मोईरङ्गथेम थोइवा सिहको अग्रता लिएको थियो । उनले रोबर्ट अल्फ्रेडको क्रसमा गोलरक्षकले क्लियर गरेको बललाई बक्सभित्रैबाट जाली चुमाएका थिए । लगत्तै श्रेयसको प्रहार गोलरक्षक बिशाल श्रेष्ठले मुस्किलले बचाएका थिए ।

खेलको आठौं मिनेटमा लालमुवानपुइया स्यामुइलको बक्सबाहिरको सशक्त प्रहार क्रसबारमा लागेर फर्किएको थियो । १३औं मिनेटमा मोईरङ्गथेम थोइवा सिहको प्रहार पनि क्रसबारमा लागेर फर्कदा मनाङ भाग्यशाली सावित भएको थियो । त्यसअघि छैटौ मिनेटमा मनाङले मौका पाएपनि सदुपयोग गर्न सकेनन् । दोस्रो हाफ केहीबेरमा शुरु हुनेछ ।

पहिलो हाफको इन्ज्युरी समयमा पन्वाव १० खेलाडीमा समेटिएको थियो । इन्ज्युरी समयको दोस्रो मिनेटमा पन्जावका डिफेन्डर प्रतिक जोशी दोहोरो पहेलो कार्ड खादै मैदानबाट बाहिरिएको थियो । उनले मनाङका एडिलाजा सोमिडेमाथि फल गरेका थिए ।

समूह ‘इ’ मा रहेको मनाङ र पन्जाव जितविहीन छन् । यी दुई टोलीले अघिल्लो खेलमा २–२ गोलको बराबरी खेलेको थियो । मनाङले समूहमा पहिलो अंक जोड्न सफल हुदा पन्जावले लगातार तेस्रो बराबरीको नतिजा निकालेको थियो ।

मनाङले ३ खेलमा १ अंक जोड्दै अंक तालिकाको पुछारमा छ । पन्जाव ३ खेलमा ३ अंक जोडेर तेस्रो स्थानमा छ । २ खेलमा जित र एक बराबरी खेलेको चेन्नईन ७ अंकका साथ शीर्ष स्थानमा छ । समान एक एक खेलमा जित, हार र बराबरी खेलेको बंगलादेशी लिग च्याम्पियन क्लब अवहानी लिमिटेड ४ अंक सहित दोस्रो स्थानमा छ ।