एजेन्सी – क्रोएसियाका पुर्व खेलाडी इगर स्टिमेकलाई भारतीय फुटबल फेडेरेसनले भारतीय पुरुष फुटबल टोलीको मुख्य प्रशिक्षकमा नियुक्त गरेको छ ।

क्रोएसियाको सिनियर टोलीलाई समेत प्रशिक्षण गराइसकेको स्टिमेकलाई भारतीय फुटबल फेडेरेसनले बुधबार दुई वर्षको लागि मुख्य प्रशिक्षकमा नियुक्त गरेको हो ।

भारत एसिया कपबाट बाहिरिएसँगै तत्कालिन प्रशिक्षक स्टेफन कोन्सेन्टाइनले पदबाट राजिनामा दिएपनि भारत प्रशिक्षक विहीन रहेको थियो ।

‘हामीले क्रोएसियाका इगरलाई मुख्य प्रशिक्षकको रुपमा छनोट गरेका छौं । अल इन्डिया फुटबल फेडेरेसन (एआइएफएएफ)का सबैजनाले उनलाई प्रशिक्षक बनाउन सहमत जनाएका छन् । उनी निकै राम्रा छन् । त्यसैले हामीले उनलाई छनाट गरेका हौं ।’ एआइएफएफले भनेको छ ।

भारतीय टिमको प्रशिक्षक बन्ने दौडमा स्टिमेकसँगै स्वीडेनका हाकान इरिक्सन, अल्वर्ट रोका र लि मिङ सङ रहेपनि हामीले इगरलाई नै रोजेको टेक्निकल कमिटिका प्रमुख श्याम थापाले गोलडटकमलाई बताएका छन् ।

५१ वर्षीय स्टिमेक यसअघि सन् २०१२ जुलाईमा क्रोएसियाको मुख्य प्रशिक्षक बनेका थिए । उनले २०१३ अक्टोवरमा पदबाट राजीनामा दिनुअघि १५ महिना क्रोएसियाको सिनियर टिम सम्हाल्दा टिमलाई सन् २०१४ मा ब्राजिलमा भएको विश्वकपमा छनोट गराउन सफल भएको थियो ।

२००४ देखि प्रशिक्षण शुरु गरेका स्टिमेकले क्रोएसियाको सिनियर लिग फुटबलमा ह्याडजक स्लिटलाई लिग च्याम्पियन बनाएका थिए । त्यसपछि उनी लामो समय एसियान इरान र कतारको शाहानियाको प्रशिक्षक बनेका थिए ।

क्रोएसियाका पुर्व डिफेन्डरसमेत रहेका स्टिमेकले ५३ क्याप जित्दै दुई अन्तर्राष्ट्रिय गोल गरेका छन् । उनी १९९० देदि २००२ सम्म क्रोएसियाको टिमको मुख्य सदस्य रहेका थिए । उनले इंग्ल्यान्डको डर्वी र वेस्टह्यामबाट छोटो समय व्यवसायिक फुटबल खेलेका थिए ।