काठमाडौं (हाम्रो खेलकुद) – राष्ट्रिय फुटबल टोलीका गोलकिपर किरण चेम्जोङ र फरवार्ड विमल घर्तिमगरले अर्को महिना हुने दुई मैत्रीपूर्ण खेल खेल्ने सम्भावना कम देखिएको छ । नेपाली टोलीले जेठ १९ गते मलेसिया र जेठ २३ गते चाइनिज ताइपेसँग मैत्रीपूर्ण खेल्ने तय भएको छ ।

तर, किरण र विमल भने अर्को साता क्लब ड्यूटीका लागि माल्दिभ्स जाने तयारीमा छन् । किरण र विमल टिसी स्पोर्टस आबद्ध भएका छन् । टिसीमा किरणको यो लगातार तेस्रो र विमलको पहिलो सिजन हो ।

‘अर्को साता मंगलबार वा बुधबार माल्दिभ्स जाँदैछौं । प्रि सिजनका लागि पनि क्लबले बोलाइसकेको छ । मैले केहि दिन समय मागरे अलि ढिला जान लागेको छु, किरणले भने, मैत्रीपूर्ण खेलको लागि के हुन्छ । त्यहि गएपछि मात्र भन्न सकिन्छ ।

किरणका अनुसार अखिल नेपाल फुटबल संघ (एन्फा) का महासचिव इन्द्रमान तुलाधरले मैत्रीपूर्ण खेलका लागि मलेसिया नै आउनुपर्ने बताएका छन् । इन्द्रमान (तुलाधर) सरले क्लबलाई पत्राचार गछौं भन्नु भएको छ, उनले भने, एन्फा र क्लबको सहमति जे हुन्छ , हामीले त्यहि अनुसार गर्ने हो ।

किरणले थपे, प्रि सिजनका लागि क्लबले दुवई कतार वा मलेसिया नै लाने तयारी गरेकोले सम्भवत मैत्रीपूर्ण खेलका लागि नछाड्न सक्छ । टिसीलाई गत सिजन लिग च्याम्पियन बनाउने क्रममा किरण उत्कृष्ट गोलकिपर घोषित भएका थिए ।