रियो (एजेन्सी)– ब्राजिलियन फरवार्ड नेयमार स्पेनिस क्लब रियल म्याड्रिड जाने चर्चा सेलाएको छैन । नेयमारको पहिलो क्लब सान्तोसका अध्यक्ष जोसे कोर्लोस पेरेसले उनी रियल जान सक्ने सम्भावनालाई बल दिने अभिव्यक्ति दिएका छन् ।

रियल आफ्नो टोलीलाई नयाँ संरचना दिने क्रममा जुटिसकेको छ । त्यहि क्रममा रियलले सान्तोसका रोड्रिगोलाई भित्राएको छ । त्यस्तै चेल्सीका फरवार्ड इडन हाजार्डलाई लिने प्रयासमा रहेको छ । पेरेसले एक कदम अघि बढ्ने क्रममा पेरिस सेन्ट जर्मेन (पिएसजी) का नेयमारलाई रियलमा देख्न चाहेको बताएका छन् । ‘मलाई आशा छ उनी रियल जानेछन्,’ उनले भने, ‘उनका लागि त्यो ठाँउ विश्वकै उत्कृष्ट गन्तव्य हो,’ उनले भने ।

पेरेस त्यतिमा रोकिएनन् । बार्सिलोना छाड्ने उनको निर्णय पुरै गलत भएको बताएका छन् । दुई वर्षअघि नेयमार विश्व कीर्तिमानी रकममा बार्सिलोनबाट पिएसजी पुगेका थिए । ‘उनी अझै राम्रो खेलाडी बन्ने क्रममा थिए । उनले बार्सिलोना छाडेदेखि राम्रो गर्न सकेका छैनन्,’ उनले भने,’ म रियललाई पछ्याउँदै आएको छु । रियल सहि ढंगले अघि बढेको छ । यदि नेयमारले रियलको जर्सी लगाउने अवसर पाउँछन् भने मलाई लाग्छ त्यसमा दुई पटक सोच्नु पर्दैन । ‘

पेरेसले सान्तोसका बारेमा जानकारी दिने क्रममा भने, ‘हामीसँग पेले र अन्य त्यस्तै उत्कृष्ट खेलाडी रहे । हामी युरोपमा वर्षमा ६० देखि ७० वटा मैत्रीपूर्ण फुटबल खेल्थ्यौं । तर अहिले त्यो सम्भव छैन । हामी कहाँबाट पेले, रोविन्हो, नेयमार र अहिले रोड्रिगो जस्ता खेलाडी तयार भए । ‘

सान्तोसले जहिले पनि आक्रमक फुटबललाई प्राथमिकतामा राखेको उल्लेख गदै पेरेसले भने, ‘हामी जहिले पनि विपक्षलाई नियन्त्रणमा राख्ने प्रयास गछौं । हामी फेरि विजयी हुनेछौं । हामी अन्तर्राष्ट्रिय स्तरमा सबै भन्दा परिचित ब्राजिलियन क्लब हौं,’ उनले थपे ।

रियलले नेयमारलाई लिन चाहेमा पिएसजीलाई १ सय ७० मिलियन युरो रिलिज क्लजका रुपमा तिर्नुपर्ने हुन्छ । सम्भवतः अर्को सिजन त्यो क्लज तोडिनेछ ।