सिटीलाई च्याम्पियन्स लिगमा प्रतिबन्ध हुनसक्ने

एजेन्सी – युरोपेली फुटबलको सर्वोच्च निकाय यूईएफएले प्रिमियर लिग च्याम्पियन म्यानचेस्टर सिटीमाथि आर्थिक नियमावलीमा अनियमितता गरेको आरोपमा अनुसन्धान गर्ने भएको छ ।

न्यूयोर्क टाईम्सले जारी गरेको रिपोर्टका अनुसार सिटीले अनियमितता गरेको प्रमाणित भए क्लबले एक वर्ष प्रतिबन्ध भोग्ने सम्भावना रहेको छ । यूईएफएको अनुसन्धान विभागले यसै साताको अन्त्यसम्म निर्णय सार्वजनिक गर्ने बुझिएको छ । सिटीले प्रायोजन सम्झौता गर्दा अनियमितता गरेको आरोप लाग्दै आएको थियो ।

बेल्जियमका पूर्व प्रधानमन्त्री तथा अनुशासन विभाग प्रमुख वेज लेटेर्मेले क्लबलाई कारवाही हुन सक्ने संकेत दिएका छन् । सिटीले भने आफूले कुनै अनियमितता नगरेको बताउँदै आएको छ । यूईएफएले प्रमाणित गरेको खण्डमा क्लबले एक सिजन च्याम्पियन्स लिग खेल्न पाउने छैन । यद्दपी सिटीले अर्को सिजन च्याम्पियन्स लिग खेलेर त्यसपछिको सिजनमा सहभागिता जनाउन पाउने छैन ।