रोम (एजेन्सी)– युभेन्ट्सका पूर्व मिडफिल्डर आन्द्रे पिर्लोले टोलीमा रियल म्याड्रिडका इस्को जस्तो खेलाडीको आवश्यकता रहेको बताएका छन् । उनले क्रिस्टियानो रोनाल्डोलाई बढी भन्दा बढी बल निकाल्दिनका लागि इस्को जस्तो खेलाडी आवश्यक पर्नेमा जोड दिएका छन् ।

च्याम्पियन्स लिग जित्ने लक्ष्यसहित युभेन्ट्सले यहि सिजनको सुरुवातमा रोनाल्डोलाई रियलबाट लिएको थियो । तर, टोलीले यसपटक टोलीले च्याम्पियन्स लिगमा क्वार्टरफाइनलमा भन्दा अघि बढ्न सकेन । टोली आयक्ससँग पराजित भएको थियो ।

घरेलु लिगमा उच्च प्रदर्शन गरेपनि टोलीले च्याम्पियन्स लिगमा सफलता हासिल गर्न सकेको छैन । पिर्लो भने इस्को जस्ता खेलाडी भित्राउन सके टोलीको लक्ष्यमा सहज हुने बताउँछन् । ‘मलाई लाग्छ हामीलाई इस्कोको आवश्यकता छ’, उनले भने, ‘हामी अर्को स्तरमा छौं । तर पनि हामीले च्याम्पियन्स लिग जित्न बाँकीछ । भविष्यको टोली कस्तो बनाउनुपर्छ भन्नेमा प्रशिक्षक विचार गरिरहेका होलान् । हाम्रो मिडफिल्डमा सुधार्नुपर्ने छ । ‘

युभेन्ट्सले अहिलेको अवस्थमा सुधार गर्न मिडफिल्डमा केहि स्तरीय खेलाडी भित्राउन पर्ने देखिन्छ । जसले टोलीको च्याम्पियन्स लिग चुनौति बलियो हुनेछ । घरेलु फुटबलमा भने टोली निकै मजबुत अवस्थामा छ । टोलीले सिरि ए उपाधि जितिसकेको छ ।

अर्कोतर्फ रियलमा इस्कोको अवस्था पनि सन्तोषजनक छैन । उनलाई युभेन्ट्स भित्राउन सम्भवत यो सहि समय हो । रियलले आउँदो सिजन टोलीमा ठूलो फेरबदल ल्याउने अपेक्षा गरिएको छ ।