भानु अधिकारी
सुर्खेत – नेपाली महिला टोलीको मुख्य लक्ष्य भनेको साफ च्याम्पियनसिपको उपाधि जित्नु रहेको टोलीका मुख्य प्रशिक्षक हरि खड्काले बताएका छन् । खड्काको प्रशिक्षणमा रहेको नेपाली टोली गत महिना साफ च्याम्पियनसिपमा उप विजेता बनेको थियो ।

पाँचौं संस्करणसम्म आइपुग्दा नेपाल अहिले सम्म च्याम्पियन बन्न सकेको छैन । चार पटक उपविजेता र एक पटक समूह चरणबाटै बाहिरिएको थियो । खड्काले नेपाली टोली च्याम्पियन बन्नका लागि सक्षम रहेको दोहोराएका छन् । नेपाली राष्ट्रिय टोलीको प्रायोजक केल्मीको सुर्खेतमा शो रुम उद्घाटन गर्न आइपुगेका खड्काले महिला टोली अर्को संस्करणमा च्याम्पियन हुने गरि तयारीमा जुट्ने बताए ।

‘नेपालको मुख्य प्रतिस्पर्धा भनेको भारतसँग हो’, उनले भने, ‘ भारतसँग हाम्रो अवस्था बराबरीको हो । फेरि पनि हाम्रा लक्ष्य भनेको भारतलाई हराउने हो ।’ फागुनमा भारतमै भएको हिरो गोल्डकपमा भने नेपालले भारतलाई हराएको । महिला फुटबलमा नेपालले भारतलाई हराएको त्यो पहिलो थियो ।

खड्काकै प्रशिक्षणमा नेपाली महिला टोलीले ओलम्पिक छनोटको दोस्रो चरण पुगेको थियो । हालै सम्पन्न एन्फा डेमा खड्का उत्कृष्ट प्रशिक्षकबाट सम्मानित भएका थिए । महिला फुटबल टोलीलाई हौसला बढाउनु पर्नेमा जोड दिदै खड्काले राज्यले खेलाडीका लागि लगानी गर्नुपर्ने बताए ।

उनले क्रिकेटमा जस्तै फुटबलबाट पनि सफलताको आशा गर्न सकिने प्रष्ट पारेका छन् । ‘नेपाली खेलाडी प्रशिक्षणमा केन्द्रित गराउन लगानीको बातावरण बनाउनुपर्छ’, उनले भने, ‘ हाम्रा खेलाडीको हौसला बढाउन सके सफलाको आशा गर्न सकिन्छ । ‘