म्यानचेस्टर (एजेन्सी)– म्यानचेस्टर युनाइटेडका मिडफिल्डर आन्द्रे हेरेराले सिजनको अन्त्यमा क्लब छाड्न प्रष्ट पारेका छन् । पछिल्लो पाँच वर्षमा २ सय भन्दा बढी खेल खेलिसकेका हेरेराले आफुलाई क्लबका महत्वपूर्ण खेलाडीका रुपमा स्थापित गरिसकेका छन् ।

स्पेनिस मिडफिल्डर टोलीमा एकरुपताको प्रदर्शन गर्ने खेलाडीमा पर्दछन् । नयाँ सिजनका लागि ओले गुनार सोल्सजरको योजनामा हरेरा पर्ने सम्भावना हुँदा हुँदै उनी भने क्लब छाड्ने निर्णयमा पुगेका छन् ।

‘रातो रंग मेरो हृदयमा रहनेछ । मैले पहिलो पटक यो जर्सी लगाएर खेल्दानै मैले बुझे । त्यो क्षण स्मरण रह्यो, ‘ २९ वर्षे उनले भने,’ हजारौं समर्थकले आदर गर्छन् र क्लबका लागि योगदान गर्ने खेलाडीलाई सधै स्मरण गर्छन् । म विशेष महसुस गर्छु जति बेला मेरो नाम गुन्जिन्छ । मलाई जति बेला समर्थकले सम्झने छन् मलाई गौरव लाग्नेछ । ‘

उनले युनाइटेडलाई सधै आदर गर्ने पनि बताएका छन् । ‘हार वा जितमा पनि म क्लबको साथ रहनेछु । भलै म मैदानमा हुने छैन । क्लबको अर्थ मैले बुझेको छु,’ उनले भने, ‘म २ सय भन्दा बढी खेलिएका सबै खेल सम्झनेछु । मैले इंग्ल्यान्डको उत्कृष्ट क्लबको जर्सी लगाएको छु । यो पछिल्लो पाँच वर्षका लागि धन्यवाद । ‘