एजेन्सी – जर्मन बुन्डेसलिगाअन्तर्गत शनिबारको खेलका नतिजासँगै उपाधि होडमा थप रोमान्च थपिएको छ । लिगको शीर्षस्थानमा रहेको साविक विजेता बायर्न म्युनिख गोलरहित बराबरीमा रोकिनु र डर्टमुन्डको जितले लिग उपाधि छिनोफानो अन्तिम दिनसम्म लम्बिएको हो ।

तेस्रो स्थानको आरबी लाइपजिगले घरेलु मैदानमा बायर्न म्युनिखलाई गोलरहित बराबरीमा रोकेपछी बायर्नले उपाधि पक्का गर्न सकेन । यस खेल जितेको भए बायर्नले उपाधि रक्षा गर्ने थियो । यता डर्टमुन्डले भने घरेलु मैदानमा फोर्चुना डसलडर्फमाथि ३-२ को रोमान्चक जित निकाल्यो ।

पहिलो हाफको ४१ औं मिनेटमा क्रिस्टियन पुलिसिचले डर्टमुन्डलाई अग्रता दिलाएका थिए । दोस्रो हाफको ४७ औं मिनेटमा ओलिभर फिन्कले डसलडर्फका लागि बराबरी गोल फर्काए । त्यसको ६ मिनेट नबित्दै थोमस डिलेनीले डर्टमुन्डको अग्रता पुन:स्थापित गरे ।

इन्ज्युरी सामुको पहिलो मिनेटमा मारियो गोट्जेले डर्टमुन्डलाई २ गोलको अग्रता दिलाए । तर लगत्तै दाविद कोनाकीले डसलडर्फको लागि गोल फर्काए । डर्टमुन्डले एक गोलको अग्रता जगाउँदै लिगको छिनोफानो अन्तिम खेलसम्म पुर्यायो ।

एक खेल बाँकी रहेको अवस्थामा बायर्नको ७५ अंक छ भने डर्टमुन्डको ७३ अंक रहेको छ । अन्तिम चरणको खेलमा डर्टमुन्डले बोरुसिया मोन्चेनग्लाडबाकको मैदानमा खेल्नेछ । बायर्नले भने आइन्ट्राक्ट फ्रान्कफर्टको अतिथ्यता गर्नेछ ।