एजेन्सी – म्यानचेस्टर युनाइटेडका मिडफिल्डर पल पोग्बाले लियोनेल मेसी र क्रिस्टियानो रोनाल्डोका कारण आधुनिक फुटबलमा अन्य खेलाडीको स्तरमाथि नै प्रश्न उठेको अभिव्यक्ति दिएका छन् ।

पोग्बाले आफ्नो यस सिजनको प्रदर्शन राम्रो भएपनि विश्व फुटबलमा मेसी र रोनाल्डोले गरेको प्रदर्शनका कारण अन्य खेलाडीको प्रदर्शन छायाँमा परेको बताएका हुन् । यी दुई खेलाडीले विगत एक दशकमा लगातार राम्रो प्रदर्शन गर्दा अन्य खेलाडीबाट पनि सोहि किसिमको अपेक्षा गर्न नहुने पनि उनले प्रष्ट पारे ।

‘ मेसी र रोनाल्डोले पछिल्लो एक दशकमा गरेको प्रदर्शन सामान्य होइन । यो निकै विशेष छ र सायद दोहोरिन पनि कठिन छ । लगातार एकै स्तरको प्रदर्शन गरिरहन सहज हुँदैन,’ उनले थपे, ‘विगतमा एकै सिजनमा २० गोल गर्ने खेलाडी पाउन धौ-धौ हुन्थ्यो । अहिले मेसी र रोनाल्डोको आगमनपछि अन्य खेलाडीको प्रदर्शन पनि सोहि किसिमको होस् भन्ने अपेक्षा हुन्छ । त्यो सम्भव छैन ।’

पोग्बाले विगतको तुलनामा अहिले फुटबल स्तर बढेको बताए । ‘फुटबल निकै परिवर्तन भएको छ । मैले डेल पिएरो, लुइस फिगो, फ्रान्सेसको टोट्टी लगायत खेलाडीको खेल हेरेर हुर्किएँ । यी सबै खेलाडी आ-आफ्नो जमानाका सफल खेलाडी हुन् । तर यीमध्य धेरैले हरेक सिजन २० गोल पनि गरेका थिएनन् । अहिले मेसी र रोनाल्डोको प्रदर्शनले अन्य यस्ता खेलाडी छायाँमा परेका छन्,’ पोग्बाले प्रष्ट पारे ।

२६ वर्षीय पोग्बाले फ्रान्सलाई विश्वकप दिलाउँदै सिजन सुरुवात गरेका थिए । उनले यस पटक आफ्नो करिअरकै उत्कृष्ट प्रदर्शन गर्दै १६ गोल पनि गरे । यसका बाबजुद समर्थकहरु उनको प्रदर्शनबात सन्तोष मानिरहेका छैनन् । पोग्बा भने यसलाई लिएर चिन्तित देखिँदैनन् ।

‘मैले जुनसुकै पोजिसनमा पनि आफूलाई खेल्न सक्ने बनाएको छु । मैले आक्रमण होस् या डिफेन्स, टोलीको रणनीति अनुसार नै प्रदर्शन गरेको छु । प्रशिक्षकको सोचाइ र खेल्ने शैलीमा मेरो प्रदर्शन निर्भर हुन्छ,’ पोग्बाले प्रष्ट पारे ।