एजेन्सी–म्यानचेस्टर सिटी, बार्सिलोना र आइभरी कोस्टका पूर्व मिडफिल्डर याया टाउरेले खेल जीवनबाट सन्यास लिएका छन् । यायाका एजेन्टका अनुसार अब उनी प्रशिक्षणमा जुट्नेछन् । ३५ वर्षे मिडफिल्डर सन् २०१८ डिसेम्बर देखि ग्रिस टोली ओलम्पियाकोसमा आबद्ध थिए ।

गत सिजन प्रिमियर लिग जितेपछि सिटीले उनलाई रिलिज गरेको थियो । त्यसपछि उनी ग्रिस क्लबमा आबद्ध भएका थिए । सिटीमा उनले ३ प्रिमियर लिग, एउटा एफए कप र दुई वटा लिग कप जिते । ‘यायाले खेल जीवन अन्त्य गर्ने निर्णय गरेका छन्,’ उनका एजेन्ट दिमित्री सेलुकले भने ।

पछिल्लो महिना मात्र पनि तत्काल फुटबलबाट सन्यास नलिने यायाले बताएका थिए । यायालाई अफ्रिकाका उत्कृष्ट खेलाडीमध्ये एक मानिन्छ । अफ्रिकन फुटबल इतिहासमा उनको खेल जीवनलाई सफल मानिन्छ । त्यसैले खेल जीवनो उच्च अवस्थामै रहँदा उनले सन्यास लिने घोषणा गरेको बताएको छ ।

यायाका एजेन्टले भने,’ हरेक खेलाडी सम्भव भएसम्म लामो समय खेल्न चाहन्छ । यात्रा अझै पाँच वर्ष खेल्न सक्ने थिए ।’ चार पटक अफ्रिकन वर्षका उत्कृष्ट फुटबलर रहेका यायाले सन् २००९ मा बार्सिलोनाबाट च्याम्पियन्स लिग जितेका थिए ।

त्यसपछि उनी आठ वर्ष सिटीमा रहे । जहाँ उनले ३ सय १६ खेल खेल्ने क्रममा ७९ गोल गरे । उनले २०११ को एफए कपमा विजयी गोल गरेका थिए । आइभरी कोस्टका लागि १ सय १ खेल खेल्ने क्रममा उनले २००६, २०१० र २०१४ को विश्वकप खेलेका थिए ।

मलाई विश्वास छ , ‘यायाले आउने दुई वर्षमा प्रो कोचिङ लाइसेन्स लिनेछन् । उनी उनी एउटा राम्रो क्लबको मुख्य प्रशिक्षक हुनेछन्,’ एजेन्टले भने, ‘प्रशिक्षणमा पनि उनी सफल हुनेछन् । उनी आफ्नो लक्ष्यतर्फ अघि बढेका छन् । ‘