सुआरेजले कोपा डेल रे फाइनल गुमाउन सक्ने

एजेन्सी – बार्सिलोनाका फरवार्ड लुइस सुआरेजले कोपा डेल रेको फाइनल खेल गुमाउन सम्भावना बढेको छ । उनको घुँडाको शल्यक्रिया गर्नुपर्ने भएको बार्सिलोनाले जनाएको छ ।

दाँया घुँडाको मेडियल मिनिस्कसमा चोट बोकेपछि शल्यक्रिया गर्नुपर्ने भएको हो। उक्त चोटबाट पूर्ण रुपमा निको हुन कम्तीमा ६ हप्ता लाग्ने छ। कोपा डेल’रे अन्तर्गत फाइनलमा बार्सिलोनाले मे महिनाको २५ तारिखमा भ्यालेन्सियाको सामना गर्दैछ।

यसै सिजनको सुरुआतमा पनि सुआरेजले दाँया घुँडाको चोटका कारण केही समय मैदान बाहिर बिताउनु परेको थियो । उरुग्वेका ३२ वर्षे फरवार्ड उनले यस सिजन २९ खेलमा २५ गोल गरेका छन् ।

च्याम्पियन्स लिग अन्तर्गत लिभरपुलविरुद्ध दोस्रो लेगमा फितलो प्रदर्शन गरेका कारण समर्थकहरुको आलोचना खेपिरहेका सुआरेजले अब अर्को सिजनमा मात्र मैदान फर्कनेछन् । उनले उरुग्वेको पनि केहि खेल गुमाउने सम्भावना बढेको छ ।