एजेन्सी – बार्सिलोना च्याम्पियन्स लिग सेमिफाइनलको दोस्रो लेगमा लिभरपुलविरुद्ध ४-० को लज्जास्पद हार बेहोर्दै प्रतियोगिताको फाइनल पुग्न बन्चित भयो । समग्रमा ४-३ को हार बेहोरेपछि अधिकांश समर्थकले प्रशिक्षक एर्नेस्टो भालभेर्डेलाई दोष लगाए ।

क्लबका पूर्व खेलाडी तथा ब्राजिलियन फरवार्ड रोनाल्डो नजरियोले भने यसरि प्रशिक्षकलाई दोष लगाउनु उचित नभएको बताएका छन् । ‘ बार्सिलोना निकै राम्रो टोली हो । उनीहरुसँग विश्वकै सर्वोत्कृष्ट खेलाडी मेस्सी पनि साथमा छन् । तर जब बार्सिलोनाले खेल हार्छ, त्यो भालभेर्डे र कोउटिन्होको कारण हुन्छ, मेस्सी होइन,’ उनले थपे, ‘ तर जब बार्सिलोनाले कुनै खेल जित्छ, त्यो मेसीको कारण जितेको हुन्छ । यसो गर्नु भनेको अन्य खेलाडी र प्रशिक्षकको सम्मान नगर्नु जस्तै हो ।’

रोनाल्डोले लिभरपुलले खेलमा पुनरागमन गर्दै बार्सिलोनालाई पराजित गर्दा आश्चर्य मान्नुपर्ने अवस्था नरहेको बताए । ‘ जब कुनै टोली एकदम हौसिएर खेल्छ र विपक्षीलाई दबाबमा राख्छ भने नतिजा निकाल्न सहज हुन्छ । लिभरपुलले जस्तो प्रदर्शन गर्यो, त्यो नौलो थिएन । पहिलो लेगमा लिभरपुल केहि अभागी सावित भएको थियो भने मेस्सी उत्कृष्ट रहेका थिए । दोस्रो लेगमा लिभरपुलले आफ्नो खेललाई निरन्तरता दिँदै जित हासिल गरेको हो,’ उनले भने ।

रोनाल्डो हाल स्पेनिस क्लब रियल भालाडोलिडको मालिक भएका छन् । आफ्नो जमानाका उत्कृष्ट खेलाडी उनले स्पेनका दुई ठूला टोली रियल म्याड्रिड र बार्सिलोनाबाट खेले । ब्राजिललाई सन् २००२ को विश्वकप जिताउँदा उनको भूमिका महत्त्वपूर्ण रहेको थियो ।