एजेन्सी – क्लब फुटबलको दुई ठुला प्रतियोगिता युइएफए च्याम्पियन्स लिग र युरोपा लिगको फाइनल खेल्ने चारै टोली एकै राष्ट्रको बनेको यो पहिलो अवसर हो । च्याम्पियनस लिगमा लिभरपुल र टोटेनहम तथा युरोपा लिगमा चेल्सी र आर्सनलले फाइनलमा स्थान बनाएसँगै इंग्ल्यान्ड एकै वर्षमा दुई प्रतिष्ठित प्रतियोगिताको फाइनल खेल्ने पहिलो राष्ट्र बनेको हो ।

पछिल्लो समय इंग्लिस फुटबल चर्चित मानिने भएपनि टिमहरुले ठुला प्रतियोगिताका सम्मानजनक स्थितिमा पुग्न नसक्दा आलोचना खेपिरहेको थियो । तर, यो सिजन चार क्लबहरु लिभरपुल, टोटेनहम हस्टपर, चेल्सी र आर्सनल फाइनलमा प्रवेश गरेसँगै इंग्लिस फुटबल सही स्थितिमा फर्किएको सन्देश दिएको छ ।

च्याम्पियन्स लिगको दोस्रो लेगमा लिभरपुलले स्पेनिस प्रतिद्वन्द्वी बार्सिलोनामाथि ४–० को अविश्वसनीय जित तथा टोटेनहमले नेदरल्यान्डको आयाक्समाथि ३–२ को जित निकाल्दै फाइनलमा प्रवेश गर्न सफल भएको थियो । लिभरपुल पहिलो लेगमा ३–० ले तथा टोटेनहम पहिलो लेगमा १–० ले पछि परेको थियो ।

यता, युरोपा लिगमा फाइनलमा स्थन बनाउन लन्डन क्लब चेल्सीले जर्मन प्रतिद्धन्द्धी फ्रान्कफर्टमाथि जित निकाल्न पेनाल्टी सुटआउटको साहरा लिनु परेको थियो । आर्सनलले भ्यालेन्सियामाथि ४–२ को तथा समग्रमा ७–३ को जित निकाल्न सफल भएको थियो ।

त्यअघि ३५ वर्षअघि पहिलोपटक इंग्ल्यान्डका चार क्लब युरोपियन क्लब फुटबलको दुई ठुला प्रतियोगिता युइएफए च्याम्पियन्स लिग र युरोपा लिगको सेमिफाइनलमा प्रवेश गर्न सफल भएका थिए । च्याम्पियन्स लिगमा लिभरपुल र टोटेनहम हस्टपर तथा युरोपा लिगमा चेल्सी र आर्सनल सेमिफाइनलमा प्रवेश गरेसँगै सन् १९८३-८४ को सिजनपछि यो सम्भव भएको थियो । तर, यसपटक चारै इंग्लिस क्लब फाइनलमा पुग्न सफल भए । च्याम्पियन्स लिगको फाइनल १ जुनमा मड्रिडमा तथा युरोपा लिगको फाइनल मे २९ मा बाकुमा हुदैछ ।