मिलान (एजेन्सी)– बार्सिलोना र युभेन्ट्स च्याम्पियन्स लिगबाट बाहिरिएपनि इटालियन फरवार्ड मारियो बालोटेलीले लियोनल मेसी र क्रिस्टियानो रोनाल्डोप्रति आफ्नो समर्थनलाई यथावत राखेका छन् ।

यसपटकको च्याम्पियन्स लिगमा मेसी सम्मिलित बासिलोना सेमिफाइनल र रोनाल्डो सम्मिलित युभेन्ट्स क्वार्टरफाइनलमा पराजित भएको थियो । पहिलो लेग ३–० ले जितेको बार्सिलोनाले लिभरपुलसँगको दोस्रो लेग ४–० ले गुमाएपछि टोलीको यात्रा अन्तिम चारमै टुंगिएको थियो । युभेन्ट्स आयक्ससँग क्वार्टरफाइनलमा नै पराजित भएको थियो ।

लिभरपुलले अब फाइलनमा प्रिमियर लिग प्रतिद्वन्द्वी टोटेनह्यामको सामाना गर्नेछ । यसपटक मेसी र रोनाल्डो विना च्याम्पियन्स लिग फाइनल हुने भएको छ । छ वर्ष यता पहिलो पटक मेसी र रोनाल्डो विना फाइनल हुँदैछ । यी दुई खेलाडीको टोलीको पराजय पछि दुवै खेलाडीको आलोचना सरु भएको छ । तर बालोटेली भने ती सब आलोचनालाई बकवास ठान्छन् ।

सामाजिक सञ्जाल इन्स्टाग्राममा लेख्दै बोलोटेलीले भनेका छन्, ‘मेसी यलियन हुन् । यद्दपी कठिन र खराब प्रदर्शनका कारण उनीहरु पराजित भए । रोनाल्डो अहिले पनि ब्रम्हान्डका उत्कृष्ट खेलाडी हुन् । यद्दपी उनले पनि सेमिफाइनल खेल्न पाएनन् ।’

एक दुई वटा खेल खराब खेल्दैमा वा हार्दैमा यी दुई खेलाडीका बारेमा अनावश्यक टिप्पणी गर्न ठिक नहुने बालोटेलीको तर्क छ । रोनाल्डो र मेसी आ आफ्नो घरेलु लिगमा भने च्याम्पियन बनि सकेका छन् । च्याम्प्यिन्स लिगमा उनीहरुको उच्च प्रदर्शनका लागि भने अर्को सिजन कुर्नुपर्ने भएको छ ।